Емилија Динева, жената која загина во сообраќајна несреќа, е починатиот донор чии срце и бубрези се трансплантирани на тројца пациенти. По сообраќајната несреќа со мопед и бил повреден мозокот и од понеделникот се борела за живот. Синоќа, по мозочната смрт нејзиното срце беше пресадено во градите на 54 годишниот Иван Огњановски кој, како што рече неговиот син, полека се буди.
„Ќе кажам само едно големо благодарам што со донирањето се спасија три животи. Еднаш докторите го вратија татко ми во живот, сега ова е вторпат. Да стивне болката и очекуваме да се запознаеме со семејството на Емилија. Да изразиме сочуство и да знаат дека срцето на нивната ќерка, мајка, сестра, се уште чука. Ние сме сплотени сега заедно, тоа не поврзува“, рече Владимир Огњановски, син на пациентот на кој му беше трансплантирано срцето.
Тој им порача на граѓаните дека треба да се развие свеста за донорството кое спасува човечки животи.
„Сакам да им порачам на граѓаните да размислуваат за тоа, да се подигне свеста, да ги донираат органите на своите најблиски кога тие нема да можат да се спасат. Со тоа спасуваат други животи, сите еден ден ќе одиме на исто место каде што органите нема да ни бидат потребни, затоа е подобро е да се спаси човечки живот’, рече видно возбуден, Владимир Огњановски.
Граѓаните со голема возбуда ја примија веста за првата трансплантација на срце извршена тука, во земјата од наши лекари. На социјалните мрежи граѓаните изразуваат благодарност до семејството на починатата Динева кои во најтешките моменти донесоа одлука да ги донираат органите.
Во раните утрински часови, околу 02 после полноќ започна да чука првото трансплантирано срце во градите на 54 годишниот Иван Огњановски, по шест часа операција која ја извршија сплотени заедно, тимови од Државна Кардиохирургија), Клиника Жан Митрев и Клиника Систина и КАРИЛ.
Првата трансплантација на срце во координација со министерот за здравство Венко Филипче ја започна и ја водеше националниот координатор за трансплантација д-р Маја Мојсова Мијовска. Таа со својот тим болнички координтори д-р Билјана Андоновска, д-р Весна Дурнев и Адријана Георгиев од Министерството за здравство ја процесираа пациентката во мозочна смрт и ги направија сите лекарски, технички и административни подготовки за да се започне со трансплантацијата на срце и бубрези.
„Трансплантацијата е успешна. Ова е голем ден за нас. Посебен по многу нешта. Би сакале најпрво да се заблагодариме на семејството на донорот. Да се донесе одлука да се даруваат органи во моментот кога го губите саканиот, е тешко. Незамисливо тешко. Потребно е многу сила, многу љубов и многу хуманост да мислите на нечиј туѓ живот во моменти кога знаете дека сте го изгубиле најблискиот. И за ова сме им бескрајно благодарни. Тие се се хероите на оваа приказна. Би сакал да им се заблагодарам на лекарите од јавното и приватно здравство, медицинските сестри, координаторите и сите оние кои тимски ја направија трансплантацијата. Ова е огромен успех за македонското здравство“, порача министерот Филипче, по посетата на пациентот.
На експлантацијата работеа д-р Марјан Шокаровски и д-р Александар Колевски од Клиниката за државна кардиохирургија, д-р Александар Николиќ од Аџибадем Систина, а од КАРИЛ анестезијата ја водеа др Маја Мојсова Мијовска, д-р Весна Дурнев и д-р Билјана Андоновска.
Трансплантацијата на срцето ја работеа проф. д-р Сашко Јовев и академик Жан Митрев заедно со д-р Васил Папестиев, д-р Марјан Шокаровски, д-р Ванѓел Здравески, д-р Кјутим Џелили, д-р Тања Анѓушева, д-р Никола Христов, д-р Стефанија Хаџиевска, д-р Надица Мехмедовиќ, д-р Весна Миташова, д-р Јасмина Илиевска, д-р Марија Гераковска и д-р Димче Славевски од Аџибадем Систина.
На Клиниката за урологија беа извршени две трансплантации на бубрезите од лекарски тимови под раководтсво на д-р Сашо Дохчев, д-р Александар Трифуновски, д-р Ставридис и д-р Јанчулев со тим лекари од клиниката.
Во оваа постапка беа вклучени и лекарите од Институтот за трансфузиологија кои ја направија комплетната обработка за совпаѓање на донорот и на реципиентите на органи, лекарите од Институтот за радилогија кои ги направија потребните снимања, како и лекарите од Клиниката за нефрологија кои ги водеа и подготвија за трансплантација пациентите на дијализа.
Пациентите кои ги добија органите беа избрани од Националните листи за чекање за срце и бубрези според медицински утврдени криетриуми за совпаѓање кои ги изготви и со кои раководи Министерството за здравство.