По деветти пат Европскиот парламент (ЕП) бара Европската унија да отвори преговори за членство со Македонија. Ова е главната порака на идната Резолуција за Македонија која ќе биде усвоена на пленарна средница за еден месец а која денес ја изгласа Комитетот за надворешни работи на ЕП.
Автор на Резолуцијата е словенечкиот либерал Иво Вајгл а таа доби 47 гласа “за” и 10 “против” на денешното гласање во Брисел.
Предлогот на Резолуцијата доби 296 аманмдани од пратениците и по опширна дебата Комитетот за надворешни работи дојде до 16 компромисни амандмани.
Накусо, Резолуцијата на ЕП бара од Советот на министрите на ЕУ да отвори конечно преговори за членство со Македонија бидејќи овие безбројни одлагања имаат влијание и врз политичката ситуација во земјата и влијание врз кредибилитетот на политиката за проширување на ЕУ.
Пратениците велат дека проблемот со името не треба да го спречува отворањето на преговорите но дека тој проблем мора да биде решен пред крајот на преговорите за членство и влегувањето на Македонија во ЕУ. Комитетот за надворешна политика смета дека Фредерика Могерини, шефица на европската дипломатија, мора повеќе да се ангажира во решавање на спорот со нови иницијативи.
И непостоечкиот политички дијалог во Македонија е тема за оваа парламентарна Резолуција. ЕП ја повикува Могерини и во овој проблем да даде свој придонес и да го олесни дијалогот помеѓу поларизираните политички партии и поларизираната политичка клима во земјата. Владата и опозицијата мораат да обезбедат конструктивен политички дијалог и да соработуваат за да го забрзаат доближувањето до ЕУ, вели Резолуцијата.
Според извор на НОВА очигледно е дека ЕУ засилено се подготвува да влезе во еден вид посредништво за да се реши длабоката македонска политичка криза. Но со оглед на тоа што размислувањата на оваа тема се во тек се уште, дипломатите во ЕУ не сакаат да прогнозираат дали ќе се бара посредништво од ЕП како што беше најавено или пак ќе се оди кон некоја друга солуција.
Да споменеме исто така дека во Резолуцијата на ЕП се употребува придавката “македонски” а таа содржи и редица точки за сите актуелни проблеми во нашата земја.
Оваа Резолуција ќе биде гласана од сите 751 пратеници на ЕП во Стразбург во април.