Опасно е да се претпоставува дека стабилноста на Македонија не остава место за загриженост, пишува во коментар за Центарот за европски политички студии Ерван Фуере, поранешниот амбасадор на ЕУ во Македонија.
Во својата анализа Фуере објаснува дека сегашниот политички рецепт на ЕУ кон Македонија и регионот, со целосен фокус на стабилноста, не може да биде успешен бидејќи истовремено оди на штета на владеењето на правото и одговорноста на владата. И ја повикува ЕУ да ги употреби сите свои инструменти за да ја реши македонската криза не само заради Македонија туку и целиот регион.
Реакцијата на ЕУ од почетокот на “бомбите” на опозицијата е бавна и ограничена на изјави од типот на “сериозна загриженост” и повици за “независна и транспарентна истрага”. Но, според Фуере, овие изјави ставаат на знаење дека ЕУ нема допир со реалноста на теренот иако нејзиното извршно тело – Европската комисија (ЕК) – барем во последните два извештаи за напредок јасно вели дека е загрижена поради независноста на судството.
Јасно е дека единствен пат за излез од кризата е посилна и директна акција на ЕУ во Македонија, преку ЕУ и Службата за надворешна акција со која раководи Федерика Могерини, служба која досега молчи, предлага Фуере.
Еден од предлозите на Фуере е Советот на ЕУ да се фокусира на кризата пред таа да се влоши. Предлог кој очигледно ќе биде прифатен бидејќи високи дипломатски извори за НОВА денес потврдија дека идната недела Советот на ЕУ ќе донесе заклучок за Македонија.
Понатаму, според Фуере, ЕУ мора да се избори за независна истрага на прислушувањето со учество на познати и респектирани меѓународните личности кои, помеѓу другото, би можеле да повикуваат сведоци. «Да му се остави ова на јавниот обвинител е некредибилно поради мешањето на власта во многу случаи во судството», вели Фуере кој додава дека самата ЕК ја заклучила во своите извештаи токму тоа мешање на власта во судството.
Актуелната влада во Македонија повеќе нема кредибилитет, вели Фуере. И предлага формирање на транзициска влада чија задача би била подготовка на нов изборен процес и би ја вратила кредибилноста во државните институци.
Токму за овој процес на враќање на кредибилноста ЕУ, предлага Фуере, би требало да назначу специјален претставник во Македонија за одреден период од неколку месеци.
Освен тоа, ЕК би морала да го смени пристапот кон земјата. «Со тоа што (ЕК) продолжува да подвлекува, во последните два извештаи, дека «земјата доволно ги исполнува политичките критериуми» и покрај избликот на насилство на Парламентот во декември 2012 година и други сериозни недостатоци во реформите, таа им давав печаток на премиерот и неговата владеачка партија дека можат да продолжат да работат без одговорност», предупредува Фуере. На тој начин, ЕУ ја минира својата сопствена политика на воведување на правна држава во земјите кандидати.