Кристалина Георгиева на местото на Кетрин Ештон?
Шефовите на државите и владите на ЕУ денес продолжуваат со потрагата за претседател на Европската комисија. Фаворит на функцијата е Луксембуржанецот Жан-Клод Јункер, поранешен премиер од демо-христијанската европска партија.
Вчера во Белгија се одржа првата средба на европските шефови на држави и влади каде што британскиот премиер Дејвид Камерон повтори дека до крај ќе се спротивставува на номинацијата Јункер на чело на Комисијата.
Германската канцеларка Ангела Меркел и нејзиниот италијански колега Матео Рензи, како и многу други европски премиери, сметаат дека местото на Јункер е на чело на извршното тело на ЕУ.
Доколку денес се донесе одлука за претседател на Комисијата, таа потоа треба да биде потврдена на нов самит кон средината на јули. На тој самит ќе се бараат и политичарите за другите европски високи функции.
Така, според европскиот портал Еурактив, наследничка на Кетрин Ештон, високата претставничка за надворешна политика на ЕУ, би можела да биде Бугарката Кристалина Георгиева. Порталот јавува дека повеќе земји членки на ЕУ ја искажале својата поддршка за Георгиева која досега беше комесар за хуманитарната помош, задача која таа ја изврши со успех.
Сепак, бугарската влада се уште не одлучила кого ќе испрати во ЕУ. Владата на премиерот Пламен Орешарски се очекува наскоро да падне поради лошите изборни резултати на европските избори во мај но и поради проблемите со проектот Јужен тек.
Орешарски планира во Европската комисија да ја испрати вице премиерката Зинаида Златанова а за комесар е заинтересиран и Сергеј Станишев, лидерот на социјалистите кои се сега во коалиционата влада. Станишев е претседател на Партијата на европските социјалисти и беше на овие избори избран за европски пратеник.
Бугарските медиуми јавуваат дека претседателот Росен Плевнелиев ја поддржува Георгиева исто како и опозицијата на ГЕРБ која има големи шанси да се врати на власт. Георгиева беше номинирана на европски комесар од владата на Бојко Борисов.
Според Еурактив оваа вест за тоа дека Георгиева ќе ја наследи Ештон допрва треба да се потврди. Факт е дека за ова место ЕУ би сакала да именува женски кандидат но тука се и италијанската министерка за надворешни работи Федерика Моргерини а се уште не се знае и кој ќе го наследи претседателот на Советот на ЕУ Херман Ван Ромпеј.
Засега е речиси извесно дека на чело на Европскиот парламент ќе застане неговиот досегашен претседател Германецот Мартин Шулц. Овој социјалист беше исто така кандидат за претседател на Европската комисија но европската повелба предвидува местото да и припадне на партијата победник на изборите, овој пат демохристијаните.