Амбасадорот на САД Џес Бејли, во заедничка изјава со претставниците на ЕУ во земјава пред малку пред Владата на РМ соопштија дека нивната проценка е дека нема услови за организирање на кредибилни избори за предвидениот датум 24 .април.
Како што рече Бејли, датумот останува да го одредат политичките партии, меѓутоа доколку нема услови за 24. април, тие препорачуваат избори да бидат закажани до најскоро можниот ден кога ќе бидат завршени реформите. Бејли нотираше дека се уште не се донесени реформите за медиумите и сериозно треба да се работи на препораките од Прибе, односно итните реформски приоритети.
Тој ги повика на одговорност сите инволвирани во Договорот од Пржино да работат што побрзо да се затворат проблематичните прашања за кои се уште се преговара.
Амбасадорот не одговараше на новинарски прашања.
Во оценката на ЕУ и САД се вели:
Нотираме дека резултатите од работата на ДИК во однос на проверката на избирачкиот список во оваа фаза не се доволни за да се одржат кредибилни избори на 24 април,иако одреден напредок е направен. Исто така се уште не е постигнат договор за медиумските реформи за да се осигура поле за еднаков пристап.
Исто така сме загрижени од извештаите за притисоци и закани врз гласачите и други лица. Сето ова е многу загрижувачко.
Силно ги охрабруваме сите политички лидери, и власта и опозицијата, и институциите да останат целосно посветени на имплементацијата на договорот од јуни/јули како и на чекорите превземени досега.
Ако изборите не можат да се одржат на предвидената дата, се очекува политичките лидери да работат да се обезбедат услови кои ќе овозможат кредибилни избори на најрано можниот датум, со целосно почитување на обврските и подготовките за тоа на ДИК, стои во извештајот.
„Партиските лидери го предложија 5 јуни како можна алтернатива. Сериозни напори од сите функционери сега се бараат и се потребни за да се постигнат условите кои ќе овозможат кредибилни избори, каде сите граѓани и партии слободно ќе учествуваат, пишува во заклучоците од извештајот.
Орав и Бејли потенцираа дека и понатаму како што велат одблиску ќе го набљудуваат прогресот и исполнувањето на обврските. На политичките лидери им порачуваа дека имаат обврска да ги превземат сите неопходни чекори што ќе ја вратат земјава на евроинтегративниот пат, со тоа што целосно ќе го исполнат договорот од Пржино и ќе ги спроведат итните реформски приоритети во интерес на сите граѓани.