ЕУ усвои денес санкции за Русија. Мерките се однесуваат на 21 лице од Русија и од Крим од кои 13 се Руси. Помеѓу нив се наоѓа и висок воен претставник на ниво на командата на Црното море. Списокот ќе биде објавен во Службен весник и санкциите ќе станат потоа ефективни во наредните 24 часа. Овој кус рок ќе им овозможи на финансиските институции да ги замрзнат сметките на наведените лица а ним исто така ќе им биде забранет влез на европска територија.
Министрите на ЕУ исто така денес го откажаа самитот помеѓу ЕУ и Русија закажан за ова лето.
Овие мерки, што треба да ги потврдат шефовите на европските влади на крајот на оваа недела во Брисел, се втората фаза на санкции. Првата фаза беше усвоена на 6 март на претходниот самит на ЕУ. Шефовите на влади би можеле да донесат и измени во зависност од развојот на ситуацијата на теренот. Третата фаза на санкции би требало да се однесува на економски мерки а има и предлози за ембарго за оружје.
Во меѓувреме ЕУ се надева дека дипломатските канали со Русија ќе можат да бидат отворени за да се преговара а се споменува и креирање на „контактна група„ чиј што состав не е определен.
Санкции најави и САД. Барак Обама најави мерки за седум руски и четворица украински фукнционери помеѓу кои и поранешниот претседател Виктор Јанукович. Американските санкции се однесуваат на Димитриј Рогозин, вице премиер, претседателката на Советот на Федерацијата Валентина Матвиенко и двајца блиски советници на Путин, членови на руската Дума.
Санкциите предвидуваат замрзнување на банкарските сметки и забрана за влез во САД. Според Вашингтон тие се насочени против руската воена индустрија и како и личното богатство на лицата блиски до руското раководство.
– Објект на мерката се тие кои ги поткопуваат демократските процеси во Украина и нејзините институции, се закана за мирот, безбедноста, стабилноста, суверенитетот и територијалната целовитост на земјата и придонесуваат за злоупотреба на надлежностите, изјави претставник на американската администрација.
Преку Твитер Обама рече дека „ќе продолжиме да и стваме јасно на знаење на Русија дека понатамошни провокации ќе донесат само понатамошна изолација на Русија„. Тој вели дека САД стојат зад Украина и нејзиното право да ја определува својата судбина.
Европските и американските мерки внесоа страв во лондонскиот финансиски Сити каде што свои бизниси имаат руските олигарси. Сити стравува дека мерките ќе ги натераат олигарсите да го повлечат својот капитал. Повеќе руски компании минатата недела повлекоа капитал од фондовите инвестирани во Лондон и Њујорк.