Комесарот за проширување Јоханес Хан вели дека е уверен оти земјите-членки на ЕУ ќе дадат зелено светло за почеток на пристапни преговори со Македонија. Уште повеќе, Хан смета дека земјите-членки сфатиле оти имало грешки од страна на ЕУ кога е во прашање Македонија, пишува Дојче Веле.
„Ако девет пати не одговорите позитивно на препораката за почеток на пристапни преговори тоа води кон назадување на земјата, како што и видовме, а кулминација беше 2015 година“, изјавил Хан.
Се наведува дека и непотпишувањето на указот за Законот за ратификација на Договорот од страна на претседателот Иванов нема да има влијание врз одлуката на ЕУ за почеток на преговори.
Во Договорот во член 2, став 4 б пишува: „По добивање на известување дека Собранието на Втората страна ја ратификувало оваа Спогодба, Првата страна веднаш: ќе го извести Претседателот на Советот на Европската унија дека дава поддршка за почеток на преговори за членство на Втората страна и ќе го извести Генералниот секретар на НАТО дека дава поддршка НАТО да ѝ упати покана за пристапување на Втората страна. Таквата поддршка на Првата страна е условена, прво, со исходот на референдумот, доколку Втората страна одлучи да одржи референдум, во согласност со оваа Спогодба, и второ, со целосното усвојување на амандмани на Уставот, како што е предвидено во оваа Спогодба. По добивањето на известување од Втората страна дека ги завршила сите нејзини внатрешни правни постапки потребни за влегувањето во сила на оваа Спогодба, вклучително и по завршувањето на можен референдум на национално ниво со исход кој е конзистентен со оваа Спогодба и по завршувањето на постапката за усвојување на амандманите на Уставот на Втората страна, Првата страна ќе го ратификува Протоколот за пристапување на Втората страна во НАТО. Оваа постапка за ратификација ќе се заврши заедно со постапката за ратификација на оваа Спогодба“.
Претседателот Иванов од Софија уште еднаш повтори дека нема да го потпише укaзот на Законот за ратификација на Договорот.
„Јас не сум бил вклучен во донесувањето на тој документ и зошто да бидам јас тој кој ќе го легализира документот. Како го создале и го донеле без мое учество така и нека си го завршат без мое учество… Таа е нивна одлука и нивна е одговорноста“ рече претседателот Иванов.
Јоханес Хан споменува дека освен својата уставна улога, претседателот Иванов мора да сфати дека постигнатиот договор води кон нормализација на состојбата поради која „никој не беше среќен речиси три децении“, и дека „секоја нормализација води кон подобри можности и подобри услови за живот за сите граѓани“, пишува Дојче Веле.
„Главната порака за Иванов е дека претседателот на една држава мора да биде подготвен да ги сослуша својот премиер и министер за надворешни работи. На него останува да го донесе својот суд и да има свое мислење, но минимум пристојно однесување е да се сослуша премиерот“, вели Хан. Комесарот објаснува дека зеленото светло на следниот самит на ЕУ за Македонија, не значи и автоматски почеток на преговорите, туку најпрво почеток на процесот на скрининг – ускладеноста на законодавствата на државата кандидат со правниот поредок на ЕУ .