Покрај српскиот премиер Александар Вучиќ, за намерата на Унгарија да гради ѕид долж границата со Србија, се огласи и Европската унија, која потенцираше дека не го поддржува унгарскиот план за стопирање на приливот на бегалци.
Унгарија планира изградба на ограда со височина 4 метри на јужната граница со Србија, за да го запре приливот на илегални имигранти, соопшти министерот за надворешни работи на Унгарија, Петер Сирто.
Тој рече дека, иако со истиот проблем се соочуваат многу земји од ЕУ, Унгарија не можела да чека. Оградата е планирано да биде долга 175 километри.
– Не ги поддржуваме таквите мерки и ги охрабруваме членките да најдат друг начин да го решат проблемот со бегалците, изјави Наташа Берто, пред новинарите во Брисел.
Сепак како што вели таа, земјите-членки сами одлучуваат како ќе ги обезбедуваат своите граници, така што Брисел нема овластување да го забрани поставувањето на ѕидот.
Таа додаде дека ЕУ не го поддржала ни ѕидот кој Бугарија сака да го гради со Турција, и дека нема да учествуваат во финансирањето на тој проект.
– Бугарија не бараше средства од европските фондови, но и да бараше, ние ќе го одбиевме барањето, исто како што направивме со Грција и Шпанија кога бараа пари за слични намени, надополни Берто.
Таа потенцираше дека е неопходно да се најде заедничко решение за бегалците, а не секоја земја сама да воспоставува механизми.
Европската комисија неодамна претстави план, според кој мигрантите би се распределиле на територијата на ЕУ според квоти, нешто што Унгарија категорично го одби.
По најавите за подигнување на ѕид меѓу Унгарија и Србија, се огласи и српскиот премиер Александар Вучиќ, кој рече дека е изненаден од најавата.
Тој нагласи дека тоа нема да биде решение бидејќи Србија не е виновна за тој проблем. Вучиќ најави и разговори со унгарските власти.
Според најновиот извештај на УНХЦР, бројот на бегалците и внатрешно раселените лица во 2014 година бил на рекордно ниво од 59,5 милиони луѓе, што е за 8,3 милиони повеќе отколку во 2013 година.