Агенцијата на Европската Унија за кибербезбедност (ENISA) денеска официјално објави дека прекинот во активностите на голем број европски аеродроми, што произлезе од проблеми со системот за електронска регистрација на багаж и регистрација на патници на авионот, е резултат на кибернапад, јавија британските медиуми.
„Органите за спроведување на законот истражуваат“, се наведува во соопштението на ENISA.
Во меѓувреме, објавено е дека се уште има пречки за обновување на активностите на аеродромот во германската престолнина Берлин. Како резултат на тоа, летовите со кои учесниците на вчерашниот Берлински маратон имаат намера да се вратат во своите земји беа одложени за повеќе од еден час.
Хакерите ја нападнаа американската компанија „Collins Aerospace“, која работи во областа на воздухопловните технологии. Компанијата соопшти дека била погодена од „кибернапад“ на нејзиниот софтвер што се користи на голем број аеродроми.
„Collins Aerospace“ денеска соопшти дека работи со погодените аеродроми и нивните поврзани агенции и дека е во завршна фаза на обновување на својата мрежа и продолжување на целосното работење