ЕУ вчера побара од Русија да не го вовлекува Западниот Балкан во се подлабокиот јаз помеѓу Русија и западните земји околу Украина во страв дека овој регион ризикува да стане точка на раздор во источно-западните тензии, јавува Ројтерс од Босна каде што шефицата на европската надворешна политика Федерика Могерини била во посета.
Могерини зборувала за тензиите помеѓу ЕУ и Русија велејќи дека е во интерес на двете страни “да се најдат и развиваат начини за соработка а не на конфронтациј”.
“Добро би било да се држи Западниот Балкан вон од оваа динамика и размислување и би сакала секој во руското раководство да размислува на овој начин”, рече таа на прес конференција во Сараево.
Особено Германија стави јасно на знаење дека е загрижена за руската улога на Балканот, регион кој останува политички и економски кревок две децении по крвавиот распад на Југославија.
Ројтерс објаснува дека Словенија и Хрватска влегле во ЕУ но дека Србија, Босна, Македонија, Црна Гора, Албанија и Косово се спори во реформите и ја загрижуваат ЕУ која се прашува колку е мудра нејзината политика на проширување.
Велика Британија и Германија предложиле да се дадат повеќе пари на Балканот за да се охрабрат земјите да направат промена и економската реформа да им биде приоритет. Ова е пораката која Могерини ја испратила за време на нејзината посета на Босна која во октомври имаше избори и сега е во процес на формирање влада.
Русија во ноември, за прв пат во 14 години, одби да даде поддршка за продолжување на мировната мисија во Босна која е под водство на НАТО. Русија беше воздржана на гласањето во Советот за безбедност на ОН. Истовремено Москва му понуди политичка поддршка на босанско-српскиот лидер Милорад Додик кој се залага за поделба на Босна.