Европската Унија вети 500 милиони евра за подобрување на енергетската инфраструктура во Западен Балкан, рече вчера шефицата на Европската Комисија Урсула фон дер Лајен во Северна Македонија на првата станица од турнејата низ регионот.
Објавата доаѓа откако зголемените цени на енергијата предизвикани од руската војна во Украина и почетокот на зимата предизвикаа шокови низ европските економии кои веќе се борат со зголемената инфлација.
Според Фон дер Лајен, помошта започнува со 80 милиони евра непосредна буџетска поддршка за Северна Македонија за „да помогне во справувањето со влијанието на високите цени на енергијата“.
„Но, секако дека ќе дојде повеќе. На пример, има 500 милиони евра грантови за целиот регион да инвестира во енергетски врски, енергетска ефикасност и секако обновлива енергија“, рече Фон дер Лајен, нагласувајќи ја важноста да се биде независен од руските фосилни горива.
Дел од поддршката е преку заедничко купување на гас на светскиот пазар.
„Енергијата и економската криза предизвикани од војната во Украина ја обединија Европа. Само обединети можеме да се справиме со недостатокот на енергија и храна“, рече премиерот на Северна Македонија Димитар Ковачевски.
Веста најверојатно ќе биде добредојдено олеснување за многу земји од Западен Балкан, вклучително и Северна Македонија која доби 80 милиони вера, и чие домашно производство на електрична енергија задоволува само две третини од годишните потреби на земјата.
Повеќето земји од Западен Балкан, вклучително и Северна Македонија, се во различни фази на преговори за потенцијален влез во ЕУ, при што некои нации се формални кандидати за пристап повеќе од една деценија.
Официјални претставници на ЕУ постојано изјавуваат дека земјите од Западен Балкан се дел од европското семејство и покрај долгиот процес на пристапување.
Експертите предупредија дека закочениот процес на интеграција предизвика растечки евроскептицизам, оставајќи простор за зголемување на руското влијание во регионот.
Извор: Еуроактив