Од Дирекција за заштита и спасување известуваат дека вкупно на територијата на Република Македонија се евакуирани 365 лица, а се зафатени околу 3.000 станбени објекти.
Во овој момент е многу тешко да се процени колкава е зафатеноста од поплави на земјоделски површини.
Во регионот на општина Св. Николе се поплавени околу 80 куќи од прелевањето на браната Мавровица каде на терен се екипи од ТППЕ со возило и пумпи. Од страна на Дирекцијата за заштита и спасување се однесени 22 пумпи за црпење вода и еден багер за да се извади водата.
Штипјани и натаму се снабдуваат со вода за пиење од цистерни. Веќе трет ден по излевањето на реката Брегалница, водата од штипскиот водовод не е за пиење и може да се користи само како техничка вода.
Браната на Слатинското Езеро е оштетена и прелева, отворен е само едниот вентил. По донесената одлука на Координативното тело се врши уривање на армиран бетонски преливен праг, со цел побрзо истекување на водата со што ќе се намали можноста за оштетување на браната.
Во регионот на општина Липково во с. Опае и с. Лопате поплавени се земјоделски површина. Од страна на Дирекцијата за заштита и спасување се ангажирани и на терен делуваат 2 багери и 3 камиони и им се однесени 100 ќебиња и 1000 вреќи за песок, 100 вреќи за спиење и 100 подметачи дадени од Црвен Крст и од локалната самоуправа обезбедено е храна и хигиенски материјали.
Поради намалувањето и престанување на врнежите излеаните реки се повлекуваат во своите корита. Дел од евакуираните лице се вратени во своите живеалишта. За лицата кои се евакуирани се обезбедува храна, вода за пиење, основни хигиенски продукти, кебиња, покривки, душеци, кревети.