Евакуирано е населението кај селото Слатино во о.Дебарца, по оштетувањето на браната од која истекува поголемо количество вода, информира Центарот за управување со кризи.
Екипите се на терен, но оштетувањата се уште не се санирани, ниту пак постојат сознанија дали браната може целосно да се урне.
Портпаролот на Центарот за управување со кризи Надица В’чкова изјави дека состојбата се следи и дека нема опасност од поплава што би го загрозила животот на жителите околу браната.
Таму има две куќи и луѓето биле известени дека можат привремено да се евакуираат. Тие ја следат состојбата заедно со екипите на Дирекцијата за заштита и спасување, Регионалниот центар за управување со кризи Охрид, МВР и водостопанството „Охридско Езеро“.
Насипот на браната која е изградена уште во 1963 година, попуштила и пукнала поради тоа што е направена на песоклив терен, пишува Вест.
Под браната е Слатинското езеро во кое сега истекува водата од пукнатата брана, со капацитет од околу 1.600.000 кубни метри вода, а сега во него има околу еден милион кубици вода.