„Начинот на кој законот беше предложен и се дебатираше сам по себе е знак за подготвеноста на земјата за влез во Европската унија и способноста да ги исполни демократските критериуми на Унијата“, се вели во писмото на европратеници кое неделава беше упатено до властите во Скопје.
Писмо на шест членови на Европскиот Парламент, вклучувајќи го и известувачот за правата на жените во балканските земји, Марије Корнелисен, доаѓа откако Парламентот во земјава во понеделникот донесе нов закон за прекин на бременоста во скратена итна постапка, јавува неделникот New Europe од Брисел.
Новиот закон сериозно го ограничува абортусот после 10 недели преку обврзување на жените што бараат абортус да поднесат барање до Министерството за здравство да се потврди дека тие присуствувале на советување, го информирале партнерот или сопружникот за нивната намера да абортираат и да се сретнат со гинеколог. Медиумите во земјата известуваат дека законот дополнително им забранува на жените да имаат втор абортус во рок од една година од првиот.
Членовите на Европскиот парламент се загрижени како за формата на дебатата во Собранието, така и на содржината на Законот. „Прекинувањето на бременоста е подеднакво прашање од гледна точка на јавното здравство и прашање на човековите права, конкретно поврзани со правото на жената на самоопределување“, велат членовите на Европскиот парламент и изразуваат загриженост во врска со дискусијата за важно прашање по итна постапка во Парламентот, „кога се чини дека се нема особена итност. ”
„Формата на дебатата во Собранието за вака чувствителен општествен проблем, кој има реперкусии во областа на јавното здравство, човековите права и правата на жените е причина за загриженост во врска со обврските на Македонија кон демократија и нејзиниот пат кон пристапување на ЕУ“, укажуваат на загрижените европратеници.
Што се однесува до мерките предложени во новиот закон за абортус, членовите на Европскиот парламент нагласуваат дека ниту една од нив не е врз основа на потребите на жените, ниту, пак, тие се медицински неопходни. Напротив, многу од мерките „се спротивни правата на жените за пристап до соодветна здравствена заштита, приватност, автономија, доверливост и достоинство, кои се сите гарантирани во Уставот на Република Македонија и се основните компоненти на процесот на пристапување кон ЕУ“, се нагласува во писмото.
„Додека ние целосно ја признаваме потребата за легислатива во однос на јавно здравје, вклучително и во областа на прекинување на бременоста, кои остануваат во рамките на националниот суверенитет, начинот на кој законот се предлага и дебатира е само по себе е јасен знак за подготвеноста на земјата за влез во Европската унија и способност да ги исполни демократските критериуми на Унијата,“ истануваат Корнелисен и нејзините колеги.