Здружението на европски новинари испрати отворено писмо до лидерот на групата на Европската народна партија во Европскиот парламент, Манфред Вебер, во кое бара казна за бугарскиот пратеник Александар Јорданов за неговото неприфатливо однесување кон новинарката на бугарското национално радио Силвија Великова.
Јорданов е европратеник од УДФ, кој влезе со списокот ГЕРБ. На својот Фејсбук профил по интервјуто за Бугарското национално радио, незадоволен од прашањата, тој упати напади и навреди кон Великова, кои подоцна ги избриша. Според здружението, сепак, однесувањето на европратеникот е за осуда.
„Неприфатливо е кога политичар не може да се справи со прашањата што му се поставуваат и да одговори на нив во суштина без да се компромитира себеси, да го навредува новинарот што ги поставува“, напиша Здружението на европски новинари. Тоа додаде дека „кога станува збор за претставник на владејачката коалиција, како во овој случај, ваквото однесување може да се смета како обид за притисок и повикување на институциите да го подложат на репресија новинарот за кој станува збор“.
Здружението го потсетува Вебер дека ова не е првпат новинарката Силвија Великова да биде предмет на таков став. Минатата година таа беше извадена од етерот од претходното раководство на радиото, кое се обиде да ја спречи да ја покрие контроверзната постапка за избор на главен обвинител. Отстранувањето на Великова од етерот доведе до протести, широко распространета меѓународна реакција и невидена криза во радиото, која заврши со замена на генералниот директор.
„Се надеваме дека овие постапки на претставник на ЕПП нема да останат незабележани и неовластени од раководството на партијата“, се заклучува во писмото.
Јорданов инаку е поранешен амбасадор во Македонија и еден од најгласните во Европскиот парламент со историски барања кон нашата држава.