Европската федерација на синдикатите од јавниот сектор упати писмо со поддршка до УПОЗ за остварување на правата на вработените од судската администрација на Македонија кои се во штрајк.
– Вие и Вашиот Синдикат УПОЗ и порано постојано потенциравте дека Законот за судска служба кој беше донесен во 2014 година ќе има огромни последици за работниците во судската администрација. Примената на овој Закон го докажа токму тоа. Не можеме да најдеме објаснување зошто судиите и јавните обвинители добија зголемување на додатоците на плата од 35%, а работниците кои ја вршат целата работа, останаа без бенефит.
Ова не е фер. Штрајкот, кој го започнавте на 18 мај, за израмнување на додатоците на плата за судските службеници не смее да биде игнориран од страна на ресорното Министерство и Владата. Работниците од судската администрација заслужуваат исти додатоци. Министерот, кој и самиот е работник, не смее да ги заплашува работниците кои учествуваат во штрајкот.
Таквите постапки се спротивни на Европските и меѓународните стандарди кои се усвоени од Р. Македонија, се вели во писмото од генералниот секретар на ЕПСУ, Јан Вилем Гудриан, инаку најголемиот сојуз на работниците од јавниот сектор во Европа.
Генералниот секретар Гудриан упати и порака до министерот за правда да седне на преговарачка маса.
Вработените во судската администрација од целата држава денеска повторно излегоа на протест, поворно со барање за средба со министерот за правда Валдет Џафери за да почне преговори за исполнување на барањата.
– Очекуваме конечно министерот да најде време и да се состане со претставниците на работниците. Убедуваме дека нашите барање се едноставни и брзо решливи, но за тоа ни треба дијалог со министерот кој упорно тврди дека има многу поважни работи од разговор за проблемите на работниците, изјави претседателот на Синдикатот на управата правосудните органи и заедниците, Пеце Грујовски.