Министерот за надворешни работи на Франција Лоран Фабиус вчера остро ја нападна шефицата на европската ззедничка надворешна политика Кетрин Ештон поради тоа што заминала на одмор додека во близина на Европа секој ден умираат луѓе во Ирак.
Фабиус испратил писмо до Брисел објавено на сајтот на Министерството за надворешни работи на Франција во кое ја повикува Ештон да тргне во акција: “Пред драмата која се одигрува на портите на Европа не смееме да останеме без акција. Тоа е морален императив на солидарност со заедниците кои страдаат”, пишува Фабиус.
Тој потсетува дека тој самиот бил на теренот во Ирак за да го надгледува примањето на хуманитарната помош. Во едно радио интервју на Франс Инфо Фабиус беше уште поостар: “Знам дека во западните земји е период на одмори. Но во моментот кога луѓето умираат, кога умираат во маки… е тогаш мислам дека треба да се вратите од одмор!”, рече министерот.
Според агендата на Фабиус тој самиот се откажал од својот одмор во Тунис а според агендата на Ештон таа се наоѓа во Виетнам.
Вчера ЕУ одлучи на Курдите од Ирак да им испрати оружје за да можат да се бранат против Исламската држава. Амбасадорите одлучија дека земјите членки, индивидуално можат да испраќаат оружје но истовремено ставија црвено светло за воена помош за единицата Пешмерга која е еден вид нелегална сила на Курдите во Ирак. За таква помош, рече ЕУ, потребна е дозвола на ирачките власти.
ЕУ ја поздрави акцијата на САД за сопирање на Исламската држава.
Минатата недела САД почнаа воздушни удари против опсадата на Синјар на северот на Ирак каде што Исламската држава го тера на егоздус малцинството Јазиди и креира хуманитарна криза.