Tројцата тешко повредени при експлозијата во фабриката за пиротехника во Сопиште се во критична состојба, со тешки изгореници тие се хоспитализирани на скопските клиники и се приклучени на апарати за дишење.
Истрагата за несреќата ја води скопското обвинителство, а првичните информации се дека од една искра се запалил материјал кој лесно гори и развива висока температура. Станува збор за еден вид газа кој се пакува во пиротехничките средства што се произведуваат во ИЦЕ МАК, иако се шпекулираше дека се запалил барут, пренесува Канал 5.
Хемиската реакција која се случила, предизвикала голем облак чад со звуци на придушена експлозија, а во внатрешноста се развила голема температура од која настрадале вработените. Однадвор, не се забележало ништо бидејќи инцидентот се случил внатре.
Министерството за економија формирало Комисија за анализа на постапката за давање согласност на фирмата за вршење дејност за пиротехнички средства.
Од Министерството за економија посочуваат дека комисијата ја проверила целокупната документација согласно одлуката од Владата на РМ од 11 декември 2012 година, врз основа на Законот за производство и промет на вооружување и воена опрема.
Во документацијата на „Ицемак“ постои одобрение за производство и промет на пиротехнички производи за временска модификација, забава и обука, издадено од МВР на 10 јуни 2009 година, решение за вршење на дејност промет на големо со хемикалии во посебен магацински простор, решение за употреба на предметен деловен објект, издаден од комисија од експерти од МВР и МО.