На овогодинешните собири каде што се почитува традицијата и се палат коледарските огнови, во Маџир Маало паричката за следното кумство му падна на претседателот на Република Македонија, Ѓорѓе Иванов.
– Кога паричката му паѓа на претседателот, и паѓа на државата, рече Иванов. Тој на присутните им посака поубава година, среќа и здравје за 2014 година.
Иванов се пофали дека ова е втор пат денеска на неговата фамилија да и се падне паричката за кумство. Претходно, неговата сопруга ја добила на Попова Шапка, што значи и таму неговата фамилија ќе биде задолжена за кумството.
Според граѓаните, коледарскиот оган во Маџир Маало значи можност за дружба, и социјализација. Велат и гoдинава, како и претходните години трпезата била богата, а за претходниот кум на ова место, паричката од минатата година значела успеси на индивидуално ниво.
Православните христијани со многу внимание и почит го празнуваат Божик, кој започнува да се слави со Бадник, денот пред Божик.
Со овој празник македонскиот народ поврзал многу обичаи и симболи од кои најдолго се задржале коледарските песни и огнови, бадниковото дрво и лебот со паричка.
Празнувањето започнува рано наутро на Бадник кога децата одат по куќи и пеат песни пред домаќините. Децата ги симболизираат ангелите, а пеењето вест за Христовото раѓање.