Вкупно 15 фантомски гласачи на адреса „Михаил Чаков бр. 7“ во општина Кисела Вода се наоѓаат на Избирачкиот список, утврдија денеска на терен набљудувачите на невладината „Цивил“.
Во зградата на истата адреса, во Избирачкиот список се запишани шест влеза, иако истата има само три. Во имагинарниот четврти влез се запишани шест луѓе, во петтиот се запишани пет а во шестиот од непостоечките влезови забележани се четири лица.
Граѓаните кои живеат во Кисела Вода во истата зграда, велат и порано се случувало „да се појават“ повеќе влезови наместо постоечките три.
Претседателот на „Цивил“, Џабир Дерала потенцираше дека со ова се покажуваат недоследностите и слабостите во квалитетот на изборниот процес, и изрази верување дека ваквите нерегуларности можат да бидат основа за евентуално поништување на изборните резултати.
– Ги повикувам надлежните институции да преземат соодветна акција за ваквите појави. Ваквите фиктивни гласачи и места на живеење се основа за поништување на изборните резултати. Затоа, апелирам до сите чинители во изборите да дозволат слободни, фер и демократски избори – изјави Дерала.
Тој упати апел до граѓаните на 13-ти да гласаат без страв, бидејќи нивното интимно право на глас е загарантирано и никаков притисок не треба да влијае врз нив.
„Цивил“ и во вчерашното истражување на терен, утврди дека во Кисела Вода, на адреса „Петар Дељан“ во зградата број 11 се запишани имиња за кои жителите на зградата потврдија дека немаат такви соседи.