Да се пролонгира имплементацијата на предлог Законот за изменување и дополнување на Законот за лекови и медицински помагала побара денеска Групација на фармацевтски куќи, веледрогерии, аптеки при ССК во Сојузот на стопански комори.
Групацијата бара во тој период да се формира комисија од претставници од Министерството и Групацијата кои ќе го дефинираат и разгледаат дадениот Предлог Закон.
Една од измените која предизвика бранување во фармацевтската фела предвидува правните лица кои вршат промет на големо и мало со лекови да не смеат да бидат капитално управувачки или роднински поврзани.
„Сметаме дека ова треба да изостане од причина што трето лице не може да дава насоки ниту обврзувачки законски елементи за менување на сопственичката, управувачката или организациската структура на правно лице кое е основано со приватен капитал. Ваквата законска одредба нема економски ефект за никој, а напротив кај тие фирми, кај кои веќе постои капитална поврзаност во истите со години се инвестирало, преземени се договорни обврски, вклучувајќи и банкарски кредити со домашни и странски банки, банкарски гаранции, кои што зависат и од сопственичката структура. Доколку се реализира ова постои реална можност стотици вработени да останат без работа, т.е да предизвикаме дополнителен негативен ефект врз економијата во Република Македонија“, стои во барањето на Групацијата на фармацевтски куќи, веледрогерии, аптеки во ССК.
Фармацевтите исто така сметаат дека лице регистрирано според Законот за трговски друштва, кое врши промет на големо со храна, пијалаци, тутун и нафтени деривати не треба да врши и промет на големо со лекови.