Еврокомесарот за проширување на Европската унија, Штефан Филе, излезе со коментар по објавувањето на листата на „Репортери без граници” за нивото на слобода на медиумите во земјите од светот.
Филе излезе со објава на својот профил на социјалната мрежа „твитер”.
– Слободата на медиумите се уште е голем предизвик за нашите земји-партнери. Тие мора да се подобрат во оваа сфера. Медиумите мора да се почитуваат. Тоа е една од основните вредности во Европската унија – гласи “„твитот” на првиот човек за проширување на ЕУ, каде не издвојува ниту една земја, туку говори општо.
Во рамки на преговорите за пристапување во Унијата, каде покана како кандидат чека и Република Македонија, поглавјето за слободата на изразување и слободата на медиумите е едно од најглавните и најтешките и поради тоа Филе и Европската комисија бараат чисто досие во оваа сфера од сите земји, вклучувајќи ги и членките.
Како што е познато „твитерот” го користат сите официјални лица на Европската унија, при што нивните „твитови” се земаат и како нивен официјален став оти истите тие ги објавуваат и на своите официјални интернет-страници.
Реакцијата на Филе следи по најновото истражување на организацијата Репортери без граници според кое Македонија тоне во сферата на слободата на медиумите – земјата се најде на 116 место што претсавува пад за 20 места од последниот извештај на оваа организација.