Набавката на возила за Итна медицинска помош заврши, до крајот на месецот е рокот за испорака и ги очекуваме 12-те нови возила што ќе бидат распределени на повеќе места низ државата, а најмногу во Скопје. Со одлука на владата ќе преземеме осум комбиња од Министерството за земјоделство, шумарство и водостопанство што биле наменети за некоја друга намена, но ќе може целосно да се пренаменат да бидат амбулантни возила и ќе се доопремат, изјави денеска министерот за здравство Венко Филипче.
Посочи дека со овој дополнителен број од осум возила ќе го надополнат целокупниот систем на Итна помош ширум државата. Со оваа бројка на 12 возила што ги набавуваме и овие дополнително осум возила, нагласи, сосема доволно ќе се надополни капацитетот на возила кои недостигаат.
Според Филипче, не се проблем само возилата, проблем е и кадарот. Затоа, појасни, 40 доктори во следниот период после изборите ќе бидат примени во Здравствениот дом Скопје и насекаде ширум државата.
– Исклучително ме прави горд тоа што сите млади лекари после лиценцирањето и завршувањето на стажот во Лекарската комора ќе добијат шанса за работно место токму во оваа служба. Значи сите доктори кои ќе завршат во нашата држава ќе добијат платено работно место за време од предвидениот, согласно измената на Законот за здравствена заштита, стаж од шест месеци. На тој начин ќе им биде овозможен влез во здравствениот систем. Верувам дека ќе ги стимулираме и да се надградуваат дополнително на начин на кој ќе почнат да ги добиваат знаењата и искуството на основно ниво на примарна здравствена заштита во сферата на Итната медицинска помош. Овој тренинг што сега го воведуваме ќе значи наградување на нивната експертиза, а на тој начин ќе бидат стимулирани и да останат да работат во нашата земја, додаде Филипче по отворањето на едукативната обука за ИМП и менаџирање ресурси за унапредување на здравствениот систем.
Завршена физибилити студијата за Брзата помош, по изборите ќе следи јавна дебата
Постапката за физибилитити студијата и анализата на можностите и капацитетите на услугата „Брза помош/Pre-hospital Health Care” и домашна посета, со цел изнаоѓање најдобар модел за воспоставување на јавно-приватно партнерство заврши.
Од Министерството за здравство појаснија дека Друштвото за вештачења, консалтинг и обуки БАСМЕ-КТ ДОО Скопје е избрано на тендерот за изработка на физибилити студијата за можно јавно-приватно партнерство во Итната медицинска помош. Вредноста на склучениот договор изнесува 91.450 денари.
Министерот Филипче најави и други физибилити студии за друг тип јавно-приватно партнерство на многу други нивоа во здравствениот систем. Посочи дека постојат медицински установи и болници на различно ниво за кои средствата што ги троши ФЗОМ може да се искористат поефикасно и да се зголеми пристапот и квалитетот на здравствената услуга. Во овој момент, нагласи, заедно со Фондот правиме финансиска анализа на многу институции во државата, регионални болници, центри за физикална терапија и сите институции во кои има многу трошоци, а нема навистина ефикасно и ефективно работење.
– Секаде каде е можно да вложи потенцијално приватен партнер согласно искуствата од развиените земји, сметаме дека треба да се направи таква физибилити студија. Сите наши планови по завршување на претфизибилните анализи и активности заедно со Фондот сакаме да ги презентираме на дебата, за да кажеме што е тоа што ни дава мотив да мислиме дека такви проекти може значајно да го зајакнат системот, рече Филипче по отворањето на едукативната обука за ИМП и менаџирање ресурси за унапредување на здравствениот систем.