Комисијата за заштита од заразни болести констатирала намалување на бројот на нови дијагностицирани случаи, како и на индикациите за нови тестирања за Ковид-19. Ова е сигнал за намалување на епидемијата, информира министерот за здравство, Венко Филипче на денешната прес конференција.
„Разговаравме на Комисијата за заразни болести и сето ова оди во прилог на намалување на епидемијата“, рече Филипче.
Според последните информации од Министерството за здравство, денеска се дијагностицирани 23 новозаболени пациенти, од вкупно 386 тестирања.
Министерот рече дека кога ќе почнат да попуштаат мерките за превенција, тоа ќе се прави етапно за да не се создадат големи гужви.
„Протоколите се подготвени за олабавување на мерките, датумот кога тоа ќе се случи е рано да се каже. Олабавувањето на мерките ќе оди постепено, ќе бидат задолжитени маските и дистанцата меѓу луѓето.
Министерот смета дека мерките за заштита кои ги избрала нашата држава се идеални и дека овој модел ги дал посакуваните резултати. Во однос на моделот во Шведска кој многу се спомнува во медиумите, Филипче нагласи дека ризикот е голем за да се оди на создавање на масовен имунитет на населението.
„Секоја земја има своја карактеристика, не постои универзален модел. Во однос на Шведска таму смртноста е многу голема, оваа земја е на петто место по смртност во Европа. Ризично е да се препорача стекнување на општ имунитет на населението и сметам дека премногу е голем ризикот за тоа“, истакна Филипче.
Тој уште еднаш потенцира дека вирусот може да се врати на есен од причина што тогаш се јавуваат респираторните вируси и втора причина за оваа претпоставка е дека корона вирусот има тренд на зголемување во земјите каде БСЖ вакцината не е задолжителна, така што нашата држава треба да е подготвена на тоа. Особено што тогаш се појавува и сезонскиот грип, што ќе биде комбинирано и дополнително може да ја отежне ситуација.