Министерот за здравство Венко Филипче побарал од Синдикатот на Клиничкиот центар да му дадат уште два дена, односно до петок за да одговори дали ќе има 10 процентно зголемување на платите за сите здравствени работници подеднакво, дознава НОВА од свои извори кои се вклучени во процесот на преговорите.
Минатата недела Филипче најави дека до денес ќе имаме одговор на барањето на Синдикатот откако претходно ќе разговара со министерот за финансии, а одлуката треба да помине на владина седница. Во Синдикатот не сакаат да коментираат за ова, само кратко комнтираа дека ќе чекаат на одговорот на Филипче во петок.
„Ќе почекаме до петок, не можеме да кажеме повеќе детали. Нашето барање за подеднакво зголемување на платите на сите, без да се раздвои тимот остануваат“, одговори кратко Горан Беговиќ, претседател на Синдикатот на Клиничкиот центар.
По најавата дека со јануарската плата ќе има 10 проценти зголемување на платите само за лекарите специјалисти се јаво огромно незадоволство кај медицинските сестри, лаборантите, физиотерапевтите и другите здравствени работници. Тие имаат поддршка и од лекарите низ цела држава со образложение дека работат тимски и дека покачувањето треба да важи за сите.
Од Синдикатот пак, пред два дена ја потсетија Владата дека со предложеното покачување на јануарската плата пробуваат да внесат раздор меѓу лекар и медицинска сестра, лаборанти и сите кои заеднички се вклучени во тимската работа.
„Оваа понуда за нас е едноставно неприфатлива. Овие предложени различни покачувања на коефициентот на сложеност од 10% за докторите специјалисти и 5% за останатите здравствени работници и соработници со јануарската плата длабоко задираат во меѓучовечките односи и ја нарушуваат тимската работа. Убедени сме дека треба да направите дополнителни напори и да изнајдете средства за покачување на коефициентот на сложеност од 10% и на останатите здравствени работници, како и на соработниците со јануарската плата3, потенцираа тогаш во нивното соопштение.