Published: Thursday, November 8, 2018 13:41
Министерството го осуди насилство врз медицинската сестра која утринава беше нападната од семејството на починат пациент на КАРИЛ, како и насилство врз медицински персонал кој секојдневно се бори за животот на овие пациенти сместени на оваа клиника имајќи во предвид дека станува збор за пациенти кои се во сериозна и животнозагрозувачка состојба.
Министерот доц. д-р Венко Филипче изјави дека нема да се толерира никаков вид насилство врз медицинскиот персонал.
-Насилството не е начин на кој треба да комуницираат лекар и пациент. Се сочувствува со состојбата на лицата кои претрпеле загуба, но го осудувам настанот и секој обид за насилство. Со министерот за внатрешни работа Оливер Спасовски, сме во координација, со што многу скоро, ќе добиеме помош и заштита од полицијата, изјави министерот Филипче.
Директорката на КАРИЛ, Маја Мојсова, потврди дека ова не е првпат да биде нападнато медицинско лице од оваа клиника.
-Загубата на човечки живот е непроценлива. Но, на одделението КАРИЛ ние секојдневно се грижиме и лекуваме лица кои доаѓаат во животозагрозувачка состојба. Медицинскиот персонал, најодговорно тврдам, дава се од себе, да ги спаси и одржи во живот овие пациенти. Ниту еден од нив, никој не заслужува да биде физички или вербално нападнат. Ова однесување е недозволиво, вели Мојсова и потенцира дека не е првпат медицинско лице од одделението КАРИЛ да биде физички или вербално нападнато.
Министервото за внатрешни работи е информирано и веќе го истражува случајот и ќе преземе соодветни мерки, потврдија од Министерството за здравство.
Како што веќе објави НОВА, медицинска сестра од КАРИЛ утринава во 9 и 30 била нападната физички и вербално од семејство на пациент кој починал ноќеска, во момент кога доаѓала на работа.Медицинската сестра прво била нападната од мајката на починатиот, а потоа и од другите членови на семејството кои и удирале клоци. Сестрата била одговорна да се грижи за пацинетот во изминатите денови.
На инцидентот, му претходела вербално расправија, бидејќи семејството на момчето одбивало телото да биде предадено на обдукција. Неофицијално, медицинските сестри на после инцидентот се солидирализирале и одбивале да работат, по убедување од надлежните продолжиле со работата.
Ова не е првпат медицинско лице да биде нападнато од семејства на пациенти. Пред неколку години беше нападната и др. Калина Старделова актуелна директорка на Клиниката за гастроентрехепатологија, а во 2015 година беше пукано во хирургот Љубомир Огненовиќ . Во него беше пукало од лице чија мајка починала во шок соба. Жената боледувала од карцином во терминална фаза и била донесена во многу тешка состојба.
Медицинскиот персонал бара да се зајакне обезбедувањето на скопските клиники.