Иако бројот на новозаболени пациенти со морбили е драстичо намален во последниот период, сепак се плашам дека епидемијата може да се прошири од 1 септември кога децата ќе појдат на училиште и во градинка. Затоа внимателно ќе следиме што ќе се случува, вели за „Мета.мк“ министерот за здравство Венко Филипче.
– Деновиве ќе се сретнам со министерот за образование и наука Арбер Адеми, за да видиме какви мерки ќе преземеме во врска со оние деца кои се пријавени да појдат во прво одделение, а не се вакцинирани, вели Филипче.
Во меѓувреме, во периодот пред почетокот на новата учебна година, Министерството за образование и наука прибира податоци за бројот на вакцинирани првачиња, чии документи се примени во основните училишта.
Во април годинава, министерот Филипче соопшти дека услов за упис во градинка и во училиште ќе биде децата да бидат вакцинирани. Покрај кампањата за подигање на јавната свест за имунизација, превентивни тимови одеа на терен и ги проверуваа вакциналните картони и бараа невакцинирани деца и лица да бидат имунизирани.
Со одлука на Влада од мај месец, се примаат документите на сите деца кои ги исполнуваат условите да појдат на училиште, но се запишуваат само оние кои имаат потврда дека ги примиле задолжителните вакцини.