Министерот за здравство, Венко Филипче поднесе оставка од функцијата, по трагичниот настан од модуларната болница во Тетово, каде животот го загубија 14 лица.
-Пред година и пол го регистриравме првиот ковид случај, тогаш имавме две прес конференции од оваа говорница. Оттогаш до денес секогаш стоев отворено и транспаретно пред граѓаните соопштувајќи и лоши и добри вести. Не бегав од критика, никогаш не останав должен одговор, не се откажав од битката да ја победиме пандемијата. Сите одлуки беа со една единствена цел, а тоа е да се заштити здравјето на граѓаните, изјави Филипче.
Тој кажа дека трагедијата во Тетово многу го погодила, жали за загинатите и сочувствува со семејствата. Нема зборови, додаде Филипче, што тоа може да го опишат ниту начин да се надомести загубата.
-Како лекар и министер имам интегритет, затоа од морални причини понудив пишана оставка до премиерот Зоран Заев. Сакам да се заблагодарам на сите кои веруваа и ме поддржуваа во работата, одговорните задачи и предизвиците со кои се соочував. На крај посебно се заблагодарувам на претставниците на медиумите за нивната транспарентност, посветеност и поддршката што ја добивав во најтешките моменти во борба со пандемијата, заклучи Филипче.