Владата покрај лабораториите за крв ги централизира и магацините, така што од 120 магацини за реагенси со новиот тендер ќе има само осум. Нема да има отпуштања од работа од другите лаборатории, но можни се префрлања
Наместо 12 централни лаборатории за анализа на крв како што стои во тендерот за реагенси, Владата одлучи да го намали нивниот број на осум и уште повеќе ги централизира лабораториите. Две центарални лаборатории ќе бидат во Скопје и тие ја анализираат крвта од сите болници, клиники и амбуланти во градот, а другите се во Битола,Куманово, Штип, Охрид, Струмица и Тетово. Ова го најави денеска министерот за здравство Венко Филипче.
Министерот Филипче нагласи дека нема да има отпуштања од работа на вработените во другите лаборатории, но можно е да има префрлања,според потребите. На прашање на НОВА, што ќе работи стручниот кадар во другите лаборатории во болниците и клиниките, министерот со одговор:
„Тие ќе вадат крв, ќе ги опслужуваат пациентите, ќе служат како сервис, а доколку треба некои ќе ги префрлиме на Клиничка биохемија. Мислам дека нема да има потреба или отворени сме, доколку се изнуди потреба со оглед дека апаратите се гратис, ако се јави потреба некаде да дополниме. Не очекувам, но спремни сме да интервенираме“, изјави министерот Филипче.
Над 300 апарати за анализи кои беа добиени со последниот тендер пред три години ќе бидат исфрлени од употреба, а со новиот тендер од фирмата очекуваат гратис 112 нови апарати. Вообичаено, тоа е пракса од секој тендер. Овој пат, вели Филипче, сервисирањето ќе било бесплатно. Министерот најави централизација и на магацините така што од 120, сега ќе има само осум централни магацини каде што ќе се чуваат реагенсите.
Според најавите на министерот Филипче пациентите нема да бидат оштетени, во нивните места на живеење ќе им се прават анализи кои досега не се правеле и ќе се праќаат во централните лаборатории, а во Скопје резултатите ќе се земаат истиот ден. Транспортот е вкалкулиран во цената и е должност на фирмата која ќе го добие тендерот.
Министерот изјави дека се рационализираат лабораториите во малите маста, како на пример Кавадарци каде што се прават анализи и во Здравствениот дом и во болницата. Голем број реагенси се фрлаат бидејќи пакувањата се големи, а немаат потреба од нив. Со овој тендер и со централизирање на лабораториите, вели дека заштедите ќе бидат од 10 до 20 проценти. На реакциите на стручната фела дека нема да ги задоволат потребите малите апарати кои ќе бидат поставени само за итни случаи, Филипче одговори дека ќе бидат доволни за итните случаи. Попладне и навечер ќе се прават само итни анализи за крв.
„Малите портабл апарати не ги задоволуваат потребите за сите анализи, но не ни сакаме да ги задоволуваат бидејќи се тоа многу скапи анализи. За итност комплетно ги задоволуваат потребите. За итни случаи резултатите ќе бидат истиот ден, доколку нема итност резултатите ќе бидат следниот ден“, рече Филипче.
Наспроти стручната фела која тврди дека ваквиот начин на централизација ќе не врати 50 години назад, министерот смета дека на овој начин здравството ќе заштеди, а министерството ќе ги има под контрола сите лаборатории.