Наместо да им се поклонуваме на докторите, медицинските сестри, болничарите и сиот медицински персонал, ние одбравме да бидеме сосема поинаква земја, надвор од сите цивилизациски рамки. Ние имаме поинаква визија за светот и овоземскиот живот- нам примитивизмот ни налага да ги пречекоруваме вековите, ние итаме кон мрачниот, среден век.
Конечно, сиот успех на оваа држава ние го должиме на примитивците. Од нив зависиме, тие се нашиот патоказ, тие не водат како слепци, низ сите порти на беззаконието, незнаењето, игнорирањето. Нам светот ни станаа дивјаците, она диво племе од кое зависи нашиот живот- секој наш здив, секое наше ново, и ново страдање, од кое не можеме да избегаме во пандемијава.
Да им се поклониме на масовните собири, на оние граѓани кои хипнотизирано, натискани, во транс и занес, без никакви мерки и никаква почит кон живите, се надеваат на рајот на религијата. Тие имаат гаранции за нашата смрт, ги носат во џеб и ни ги доделуваат студено, и онака сите ќе заминеме еден ден, да го сториме тоа што побрзо и поболно, ни порачуваат.
Да им оддадеме ним почит, на оние граѓани кои ги следат литургиите, да паднеме на колена пред црквите и темјаните, пред џамиите и сите молитви, да им ги бацуваме златните ланци на поповите и оџите кои ја водат оваа земја низ магливите пророштва на пропаста.
Да пратиме еден длабок поклон на дополнителната министерка за финансии од ВМРО-ДПМНЕ, извесна Гордана Димитриевска- Кочовска, за која историјата го обезбедила нејзиното почесно место. Оваа, довчерашен анонимус, денеска веќе прославена лидерка на политичката бездна, најавува дека не потпишувала заем од 90 милиони евра од Светската банка.
Министерот Венко Филипче објаснува трпеливо дека тие пари се неопходни за опремување на клиниките, којзнае зошто, сите се прашуваме, зарем не? Во борбата против пандемијата на Корона вирусот, нам не ни се неопходни клиники, ниту лекови, ниту доктори, никакви машини, апарати, операции. Нам ќе не спаси религијата, нас ќе не спасат политичките амбиси кои ни ги сервира ВМРО-ДПМНЕ, можеби во некоја идна реинкарнација треба да се гледа спасот.
Нашите поклони можат да одат понатаму и кон лидерот на полициските сили- министерот Наќе Чулев, кој наместо да избере контроли, санкции и воспоставување ред во Коронските собири, забави и изживувања, се надева на онаа примитивна машинерија, која не меле веќе со месеци, која ни чука во главите со тапаните по тактот на племенските танци.
Да оставиме за крај поклон и за лидерот на ВМРО-ДПМНЕ, Христијан Мицковски, за кој се објавуваат информации дека вршел притисок да не се истражува дали ги кршел рестриктивните мерки и посетувал теретани. Што велите за условите на опозицијата за избори, за сите оние барања до власта за гаранции дека нема да почине ниту еден човек од вирусот, доколку се оди на избори, има ли крај на апсурдите во оваа земја. Зарем мора и понатаму да се говори за срцето на племето, кое чука заедно, за да може со еден удар да бидеме покосени сите.
Ние се надеваме на примитивизмот, само тој ќе не спаси, само така можеме да се одржиме. Филипче мора да биде втурнат во тој вртлог, дивото племе да му го одредува судниот час, и нам и него, како што само приличи на една мала, исплашена од нормалноста, една примитивна орда, од која никогаш нема да можеме да побегнеме.