Финансиската полиција поднесе кривична пријава против актуелниот директор на МТВ Марјан Цветковски.
Тој склучил договор за земање на кредит со комерцијална банка во висина од 140 милиони денари, а како залог ставил движен и недвижен имот на ЈП МТВ во висина од 294 милиони денари.
За договорот, Цветковски не побарал одобрение од Собранието со што предизвикал штета во висина од 154 милиони денари, велат од Финансиската полиција.
Кривична пријава е поднесена и против нотарка која го заверила договорот и овозможила МТВ да земе кредит од банка иако парите наменети за инвестиции ги трошеле за раздолжување.
Директорот на МТВ се гони за проневера на 2 милиони евра.
Како што објави НОВА во мај во анализата на ревизорскиот извештај за МТВ „во јули 2015, Програмскиот совет донел одлука со која се одобрува МРТ да земе кредит во банка во износ од 2,2 милиони евра за враќање на стари долгови, за што заложил недвижен имот, иако Советот воопшто немал право да донесе ваква одлука“.
За добивање на овој кредит под залог се ставени зградите 1 и 2 на „Македонско радио“, деловен простор во Велес и во Штип, комплетниот систем за ладење и греење, лифтови и други недвижности во сопственост на МРТ. Во меѓувреме, во 2016 година, МРТ поради неплатен даночен долг под залог става и две репортажни возила.
Ревизорот укажува дека ваквата состојба со имотот на МРТ, кој е под залог и има извршни решенија за наплата на парични побарувања врз недвижен имот, влијае на неизвесност во зачувувањето на правото на сопственост на имотот кој е неопходен за вршење на дејноста на МРТ. На ваков начин МРТ е задолжена да плаќа кредити за изградба на трите згради кои во меѓувреме се отстапени на други субјекти со што МРТ останува и без право на користење на најголем дел од недвижниот имот.
МРТ е во банкрот – нема ниту имот, ниту опрема, во залог дадени и грејните тела