Сите оние кои имаат фирми повеќе нема да можат да ги регистрираат на домашна адреса доколку Собранието ги усвои измените во Законот за трговски друшта направени на иницијатива на владата.
„Целта на предложените дополнувања на Законот за трговските друштва е воведување одредби со кои ќе се предвиди обврска за трговските друштва, седиштето на фирмата да мора да се регистрира во деловната просторија, во негова сопственост или во негово владение“, стои во предлог законот доставен од економија до Собранието“, информираат институциите.
НОВА разговараше со претседателот на бизнис конфедерацијата Миле Бошков кој предложените измени го оцени како „нестимулативни во вакво време“.
„Самата регистрација на деловен простор е оптоварувачка. На пример, вие можете да ја регистрирате фирмата на домашна адреса и да се спасите од висока кирија бидејќи ова е слободен пазар и киријата може да биде и 1 евро ако сакате. Но, ако измените се вакви какви што велите, тогаш вие ќе морате вашиот домашен простор да го регистрирате како деловен, а тоа подразбира правење елаборати и многу други активности кои земаат пари и време, тоа не знам колку ќе биде издржливо за малите трговци и колку е добредојдена ваква мерка во вакво време“, вели Бошков за НОВА.
Доколку овој предлог помине во Собранието, деловен простор ќе мора да закупат или купат на пример и таксистите.
„Прво не тераа да регистрираме фирми. Тоа не оптовари бидеќи плаќавме фирмарини. Потоа стававме фискални во таксиметарот, а сега и деловен простор ли да закупувам кога моето работно место е возило„, вели Душко.С., таксист од Скопје.
Невена. А. е самохрана мајка која од пред неколку месеци започнала сопствен бизнис изработувајќи дизајнирани чаши, пепелници, маички и друго. Сакала да биде чесна, па регистрирала фирма.
„Плаќам данок, но работам од дома. Јас немам шанси да закупувам простор, јас се правам сама. Не знам како ќе биде, ќе видиме„, вели Невена.