„Фокус“, поточно уредничката Јадранка Костова и новинарот Владо Апостолов го добија случајот со екс директорот на УБК, Сашо Мијалков, во Судот за човекови права во Стразбур, објави веб изданието на весникот.
Апликацијата, како што потсетува „Фокус“ беше поднесена во 2016 година, откако пред домашните судови, весникот и новинарите беа осудени за клевета и навреда на тогашниот директор на УБК, за што му платија штета од над 9.000 евра.
Текстовите беа објавени во сега згаснатиот дневен весник „Фокус“, каде што беа пренесени изјави од поранешниот амбасадор на Чешка Игор Илиевски, кој тврдеше дека бегал од Чешка поради притисоците од Мијалков.
Во одлуката на Судот се појаснува дека новинарот и медиумот пишувале за прашања од јавен интерес, поврзани со шефот на тајната полиција, а кои можеле да придонесат во јавната дебата.