Армијата на Република Северна Македонија го доби првиот контингент од шест лесни оклопни возила од американско производство.
Како што објави министерката за одбрана Славјанка Петровска, денеска на пристаништето во Солун, Република Грција, пристигна првата испорака од лесни оклопни возила во рамките на проектот „Набавка на лесни оклопни возила на тркала“.
Оваа испорака претставува сериозен исчекор во процесот на модернизација и опремување на Армијата согласно НАТО стандардите и ќе бидат поддршка на Лесната пешадиска баталјонска група во Штип, која воедно е нашата НАТО единица, истакна министерката.
Проектот „Набавка на лесни оклопни возила на тркала“ е започнат во 2019 година со склучување на договори помеѓу владите на Македонија и САД, а до крајот на годината се очекува да пристигнат уште 27 вакви возила.
Такви возила има и словенечката армија како и црногорската армија каде набавката е во тек. (Р.Н.)
