Вработените во дневниот весник „Вест“ денеска мирно протестираа пред канцелариите на МПМ против најавите на компанијата за отпуштање на десетици вработени и намалување на платите од 10 до 20 проценти.
Вработените се појавија облечени во маички на кои беше испишан слоганот „Македонија вработува, се бориме за секое работно место“- слоган кој е дел од новата владина кампања, иронично пренесувајќи ја пораката до менаџментот и сопствениците на компанијата кои важат за блиски до владејачката партија.
Нивните колеги од „Утрински весник“ и „Дневник“ не излегоа на протестот иако и тие се еднакво засегнати од планираните мерки, со исклучок на новинарката Јорданка Ивановска од „Дневник“која дојде да изрази поддршка.
Протестот се одржуваше на паркингот кај трговскиот центар „Зебра“, односно точно под прозорецот на канцеларијата на претседателот на извршниот одбор на МПМ, Срѓан Керим. Од канцелариите на МПМ за време на протестот вработени од прозорците ги снимаа и фотографираа оние кои протестираа, но се трудеа да останат незабележани.
„Вест„ е најтиражниот дневен весник во Македонија. МПМ ги издава дневните весници „Вест“, „Утрински весник“, „Дневник“, порталот „Телеграф“, како и други забавни и спортски магазини.
Компанијата доживеа многу турбуленции откако пред три години ја презедоа бизнисменот Јордан Камчев и контроверзниот екс дипломат и бизнисмен Срѓан Керим обележан со скандалот „700,000 евра во шише“. Тие во неколку наврати комплетно ги променија уредничките состави на „Дневник“ и „Утрински“, беа обвинувани за отпуштање новинари од идеолошки причини, вработените се жалат на притисоци врз уредувачката политика, а од весниците на претходните избори направија и најголем донатор на владејачката партија ВМРО ДПМНЕ. Тимот на „Вест“ успеваше да се бори против притисоците од страна на власта и менаџментот и во неколку наврати јавно го покажаа својот револт.
