Британската амбасадорка Рејчел Галовеј на одбележувањето на платинестиот јубилеј на Кралицата Елизабетата рече дека оваа година се навршуваат 70 години служба на Нејзиното Величество Кралицата. „Кралицата која владее подолго од кој било друг монарх во британската историја, и која стана многу сакана и почитувана личност низ целиот свет“, рече амбасадорката.
Амбасадорката чиј мандат завршува по еден месец, рече дека дури и во краткото време што била тука, може да посведочи на навистина драматични и храбри промени.
„Го видов македонското знаме како гордо се вее над Молот во Лондон и гледав како Северна Македонија станува 30-та членка на НАТО. Во текот на последните неколку недели ја видов Северна Македонија како домаќин на 4.800 сојузнички трупи од 8 земји, предводени од глобалните сили за одговор на Обединетото Кралство – кои се запознаваа, се здружуваа, се обучуваа заедно и се подготвуваа заедно да одговорат на кризи. Оваа вежба се одржа во контекст на варварскиот неиспровоциран руски напад врз Украина и нејзиниот народ. И вечерва мислиме на народот на Украина“, рече Галовеј.
Таа подвлече дека Обединетото Кралство ќе продолжи да ја поддржува Северна Македонија и да ја приближува кон евроатлантската заедница. „Видов како Северна Македонија е лидер во регионот и носи тешки одлуки за климатските промени и животната средина. Во текот на изминативе 18 месеци, а пред ЦОП26 во Глазгов, минатиот ноември, работевме непосредно, заедно подигајќи ја свеста за многу реалните и сурови проблеми со кои се соочуваме околу климатските промени. Развивме енергетска стратегија која е понеопходна од кога било со оглед на нашите енергетски предизвици“, истакна Галовеј на прославата која се одржа во дворот на резиденцијата на претседателот Стево Пендаровски а чиј домаќин беше амбасадата.
„Посведочив и на зајакнувањето на нашите трговски односи со новиот Договор за партнерство за трговија и соработка. Обединетото Кралство останува еден од главните странски директни инвеститори во земјата благодарение на инвестициите на британските компании како Џонсон Мети. Северна Македонија во моментов е домаќин на најголемата фабрика на Џонсон Мети во Европа, најуспешната директна странска инвестиција во земјата“, истакна таа во говорот по повод платинестиот јубилеј на Кралицата.
Галовеј рече дека за четири недели ќе ја напушти Македонија.
„Заминувам знаејќи дека тука се случи промена. Добра промена од која нема враќање назад. И заминувам, но кога ќе се свртам и ќе погледнам преку рамото, знам дека ќе се вратам. Можеби не како дел од мојата работа, туку затоа што не може човек да живее во оваа земја и да не се заљуби.А сега, во чест на нејзиното Величество, здравица за Кралицата“, рече Галовеј.