„Не за францускиот предлог и за ултиматуми“, „не за менување историја и на учебници“, се дел од пораките од десеттиот протестен марш против модифицираниот француски предлог за деблокада на преговорите на Македонија за членство во Европската унија под мотото „Ултиматум, не благодарам“ што заврши вечерва пред македонското Собрание.
Дел од учесниците во протестот поставија шатори пред парламентот и најавија дека ноќта ќе ја поминат таму.
Протестот почна пред Владата, продолжи кон Министерството за надворешни работи, по што учесниците во протестот се упатија пред Собранието.
„Не, не, не….. Не за францускиот предлог. Ова се историски моменти, се бориме за нашата држава. Ние сме горди Македонци и тоа така ќе остане. Оставка од Владата“, порачаа граѓани кои учествуваа на протестот.
На протестниот марш беа и лидерот на ВМРО-ДПМНЕ, Христијан Мицкоски и членови од оваа партија.
Утре, како што е најавено, протестот ќе се одржи во 13:30 часот, пред почетокот на собраниската седница, на која ќе се расправа за Информација за содржината на Предлог преговарачката рамка.