Во тек е имплементацијата на „Фотографирај и Реагирај“, шестмесечен проект поддржан од проектот на USAID за граѓанско општество, кој е спроведуван од Фондација Отворено Општество – Македонија.
Проектот „Фотографирај и реагирај“ го имплементира Здружението за одржлив развој Милиеуконтакт Македонија.
Во предвидениот временски период, граѓаните во три пилот-општини (Центар, Богданци и Виница) ќе имаат можност да го користат бесплатниот јавен сервис за пријавување на проблеми поврзани со животната средина.
Самиот јавен сервис се состои од три компоненти и тоа: мобилна апликација, веб страница (кои веќе се функционални!) и бесплатна телефонска линија (која ќе биде пуштена во текот на неделата).
Целта на овој сервис е сите пријавени проблеми од областа на животната средина да бидат побрзо регистрирани и решени од страна на надлежните.
Сервисот ќе служи како корисна алатка во секојдневниот живот на сите кои сакаат да пријават проблем, а притоа ќе имаат можност да го следат и статусот на решавање на истиот.
Со помош на мобилната апликација корисниците ќе можат да го фотографираат проблемот што го забележале и истиот да го препратат до посебна база на податоци, од каде истиот ќе биде пренасочен до најсоодветниот надлежен орган за решавање на проблемот.
Самата апликација содржи и гео-лоцирање на пријавениот проблем со што дополнително се олеснува постапката за пријавување. Покрај апликацијата сервисот нуди и пријавување на проблемите преку веб страница (http://reagiram.mk/) како и преку јавување на бесплатна телефонска линија: 080 023 023.