Француски претседатели и нивните тајни љубовни врска се вистинска традиција во оваа земја. Веројатно токму поради тоа и оваа последната, на Франсоа Оланд со актерката Жули Гаје, нема на францускиот претседател да му направи голема штета во јавноста и кај избирачите доколку тие се задоволни од политиката што тој ја води.
Сите се уште се сеќаваме на Никола Саркози и неговиот развод со Сесилија кусо време откако тој влезе во Елизејската палата. Набрзо се роди љубов помеѓу него и Италијанката Карла Бруни која тој одлучи да не ја крие и со неа да се венча. Со самото тоа Саркози покажа стил поинаков од оној на неговите претходници.
Но, приказната на Жак Ширак е сосема друга. Според аналитичарите, во времето на Ширак не можело да се замисли претседателот да се разведува. Но, Ширак исто така во еден момент сакал да ја напушти сопругата поради љубовта кон една новинарка која работела за “Фигаро” чие што име останува тајна за јавноста.
Жената со која го врзувала голема љубов е политичарката Мари-Франс Гаро
Архивата брои десетици жени со кој тој имал врска. Некои од овие врски биле подолги од другите а во слатките шпекулации се врти и приказната за големата љубов на Ширак кон Јапонија.
Освен љубовта кон земјата, Ширак патувал над 40 пати во Јапонија и, според некои извори, има син во оваа земја со неговата врска со една преведувачка. Пред неколку години на виделина излезе скандал за тајна сметка на Ширак во Јапонија. Се претпоставува денес дека таа сметка постоела за издршка на детето.
Дискретните излети на Ширак oчигледно не биле секогаш ефтини. Се раскажува дека со некои од љубовниците одел на патувања кои најчесто биле плаќани од државни пари.
Докторката Мишел Барзак исто така се смета дека имала врска со Ширак
Неговата сопруга Бернардет сама признала дека нејзиниот сопруг имал голем успех кај жените. И таа, како и сопругата на Митеран, решила да остане до него.
И Франсоа Митеран не бил ангел во тој поглед. “Од една жена не можете да барате повеќе од тоа што и го давате”, се зборовите на Митеран за кој светот откри дека имал паралелна врска со Ан Пенжо со која е родена ќерката Мазарин.
.jpg)
Ан Пенжо за време на погребот на Митеран
Неговата сопруга Даниел добро знаела дека мажот треба да го дели не само со неговата страст за политика туку и со други жени надевајќи се дека токму таа ќе остане “најсаканата”. Даниел, велат, имала љубовник, минала низ депресии, заминувала и се враќала, сакала да се разведе но конечната одлука била да остане во брак и, велат, “да креира атмосфера околу Франсоа која го ослободувала од сите грижи” варејќи му чај со мед.
Валери Жискар д Естен исто така бил голем заводник кој ги сакал актерките а не новинарките или политичарките како Ширак. “Тој имаше малку апетит за новинарки кои за него не беа доволно гламурозни”, вели еден новинар. Се зборува за повеќе жени помеѓу кои и Марлен Жобер а позната е и сторијата за сообраќајка во 1974 година кога до него седела една од неговите љубовници.
Актерката Марлен Жобер
Жискар дЕстен пред неколку години издаде книга за љубовта на еден претседател вдовец со една принцеза во која многумина ја видоа Лејди Ди. Но, според британскиот печат таа прикаска не е вистина и се работи за соништата на еден стар заводник.
Историјата исто така памети дека претседателот Феликс Фор починал во рацете на својата љубовница во 1899 година.
Со сето ова искуство со своите претседатели, но и редица други политичари, станува јасно зошто Французите не сметаат дека однесувањето на Оланд е за осуда.
За разлика од францускиот печат кои љубовта на Оланд ја симнаа од првите страни, нивните колеги Британци и Американци се чудат што на прес конференција во вторникот не биле поставени многу прашања за љубовната врска. “Дали во Велика Британија или во САД претседателот ќе излезеше без последици? Веројатно не. Тоа е Франција”, вели Гардијан.
Во секој случај, најновата серија на маките на француските претседатели не е завршена. Нема сомение дека спин докторите ќе сторат се за да го намалат значењето на прикаската. Овој пат сепак настаните не им одат во прилог. Најдоцна до 11 февруари Оланд ќе треба да реши дали има или нема прва дама. Бидејќи првата дама треба да се појави на официјалната вечера кај Мишел и Барак Обама. Или можеби не? Француските претседатели имаат доволно искуство во оваа област за да се снајдат во ваква ситуација.