Се ближи крај на одморот на Арсен Венгер. Популарниот „професор“, кој по завршување на минатата сезона ја прекина соработката со Арсенал по 22 години минати во лондонскиот клуб, е пред нов предизвик во кариерата. Угледниот „Франс фудбал“ најавува дека Французинот наскоро ќе седне на клупата на седумкратниот европски шампион Милан.
„Росонерите“ во сезоната играат по принципот „топло-ладно“. Резултатите на тимот под водство на Џенаро Гатузо не се дотолку катастрофални меѓутоа во истовреме не се ниту спектакуларни, па желбата на управата за стабилизирање беше причина за влез во преговори со Венгер. Двете страни, според весникот, веќе неколку недели ги пеглаат разликите и оттука и впечатокот дека е прашање на ден кога ќе биде официјализирана соработката.
Французинот на „Сан Сиро“ нема да биде само на тренер туку ќе учествува и во трансферната политика на клубот. Многумина го гледаа во такви улоги и во ПСЖ, но, се чини, дека поконкретно и поупорно е „црвено-црното“ раководство во Милано. По заминување од Арсенал, Венгер беше поврзуван и со кормилото на Баерн Минхен, на Фенербахче и на репрезентацијата на Кина.