Франција го ратификуваше Протоколот за НАТО, објави на својот твитер профил македонската министерка за одбрана, Радмила Шеќеринска.
Според објаснувањето од француското Министерство за Европа и за надворешни работи, пристапувањето на Северна Македонија во НАТО ќе ја зајакне безбедноста на регионот и на Алијансата како целина.
Останува уште Шпанија да го ратификува протоколот за да може Македонија да стане полноправна земја членка на НАТО. Во Шпанија неодамна се одржаа избори и се уште не е формирана влада.
Дваесет и осум од 29 земји-членки практично за девет месеци го ратификуваа Протоколот за членство на Северна Македонија во НАТО, што претставува силна политичка порака, изјави денеска министерката за одбрана Радмила Шекеринска, која напомена дека денеска сме буквално на чекор од полноправно членство во Алијансата, откако изутрината ратификацијата на Протоколот заврши и во Франција.
-Денеска сме буквално на чекор до полноправно членство во НАТО, откако Собранието на на Франција го ратификуваше протоколот за нашето пристапување во НАТО. Дебатата во Националното собрание на Франција изутринава во девет беше интересна. Ова покажува дека процесот за ратификација оди брзо и дека како држава имавме право и бевме амбициозни и покажавме дека ова членство го заслужуваме и одработивме. Останува процесот да се заврши само во Шпанија. Ниту една земја-членка немаше ниту една дилема во однос на нашето членство во Алијансата, рече Шекеринска денеска одговарајќи на новинарско прашање по регионалната конференција „Улогата на жената во сочувувањето на мирот и безбедноста – Резолуција 1325 – Основа за акција, која денеска и утре се одржува во Скопје.
Додаде дека се очекува истата порака да се испрати од самитот во Лондон, како и третманот на нашата држава да биде де факто членка на Алијансата.
-Вестите од Париз покажаа дека како држава си ги реализираме своите стратеши цели и убедена сум дека овој стратешки успех ќе ни даде сила да ги завршиме другите работи, рече Шекеринска.
Во врска со тоа кога да се очекува ратификација во Шпанија, таа посочи дека таму постојат одредени дилеми околу составот на владината коалиција.
-Првата информација беше оптимистичка, дека се собира мнозинство. Дилемата е дали ќе биде мнозинска или малцинска влада. Информации ќе имаме веднаш по Лондонскиот самит, во тој момент ќе биде одржана првата седница на шпанскиот Парламент. Има работи кои зависат од нас, но има работи кои не зависат од нас рече, Шекеринска.
Пред неколку денови генералниот секретар на НАТО Јенс Столтенберг рече дека не очекува процесот на ратификација на членството на Северна Македонија во Алијансата сите сојузници да го завршат до почетокот на декември, но очекува процесот да биде завршен во почетокот на следната година. За земјава да стане членка документот треба да биде усвоен и во македонското собрание.
Џејмс Апатураи, заменик помошник на генералниот секретар на НАТО за политички прашања, во интервју за Радио Слободна Европа пред два дена изјави дека во почетокот на декември, кога ќе се одржи лидерскиот состанок на НАТО во Лондон, на сите ќе им биде јасно дека Северна Македонија е на самиот праг, а нивните очекувања се дека рано напролет земјата ќе биде и членка на Алијансата.