Академија Пандев го освои премиерниот бод во прволигашката конкуренција. Струмичани одиграа 1:1 на гостувањето кај Шкупи на стартот на новата фудбалска сезона. Двата гола на Чаир беа постигнати во второто полувреме, поточно во завршните 15. минути. „Академците“ поведоа преку Љупче Дориев во 77 минута, чаирчани израмнија во 89. благодарение на Хусеин Демири.
Пелистер, на игралиштето во Могила, ја совлада Победа со 2:1 во првата пелагониска пресметка за оваа сезона. Иве Трифуновски во 24 минута и Лукас Фереира Кардосо во 70. погодија за битолчани, единствениот за прилепчани беше дело на Борче Маневски во 51 минута од пенал.
Честа на домашните екипи во трите неделни натпревари од првото коло ја одбрани Силекс. Кратовци триумфираа над тимот на Скопје, повратник во Прва лига, со 1:0 со погодокот на Маркос де Оливеира Жуниор во десеттата минута.
Вчера, во дербито на колото и воопшто на сезоната, Шкендија го порази Вардар со 2:0. Тетовските „црвено-црни“ ги задржаа трите бода во судирот со скопските со два погодока во период од само пет минути во средината на вториот дел. Арменд Алими го потпиша првиот во 61 минута, Жуниор му се придружи во листата на стрелци во 66.
Голови немаше само на мечот меѓу Работнички и Ренова.
Прва лига, 1 коло
Шкупи – Академија Пандев 1:1
Победа – Пелистер 1:2
Силекс – Скопје 1:0
Шкендија – Вардар 2:0
Работнички – Ренова 0:0
Идно коло (20 август, 2017 год.)
Шкупи – Шкендија
Пелистер – Работнички
Ренова – Силекс
Академија Пандев – Скопје
Вардар – Победа