Зенит ремизира во руската Премиерлига пред гостувањето кај Вардар во четврток во првиот меч од групната фаза во УЕФА Европа лигата. Составот на Роберто Манчини одигра 0:0 против Динамо во Москва, но останува лидер на првенствената табела со 21 бод, еден повеќе од Локомотива Москва чии фудбалери, исто така, одигра без победник (1:1) против Ахмат Грозни.
Италијанскиот менаџер го почна натпреварот со Лунев на голот, со Кришито, Ивановиќ, Мамана и Смолникот во дефанзивната четворка, со тројката Кузјаев, Паредес и Ерохин во средниот ред и Дриуси, Кокорин и Ригони во навалната линија. На терен ги испрати и Џјуба, Полоз и Шатов меѓутоа реализација не дочека.
За тимот од Санкт Петербург ова е трет нерешен резултат во последните пет настапи во рускиот фудбалски шампионат по 1:1 со Урал во гости и 0:0 против Ростов. Во меѓувреме славеше против Ахмат Грозни со 4:0 и со 1:о против Амкар во Перм.
Дуелот меѓу Вардар и Зенит во рамки на воведното коло од УЕФА Европа лигата е во четврток на „Телеком арена“ во Скопје од 21,05 часот.