Владиката Агатангел, кој во петокот упати остри критики до градоначалникот Жерновски, за Либертас вели дека пред црквата „Свети Константин и Елена“ која е во изградба, дошол да го брани нејзиното евентуално рушење, за да ги одбрани и своите пари кои ги донирал за оваа црква.
>>Г. Агатангел: Жерновски сака да урива црква – лошо ќе помине
Тој е изненаден од критиките на европскиот владика Пимен, кој на Фесбук напиша дека кога бил пред црквата него никој не го препознал. Владиката повардарски Агатангел со коментар:
– Па него никој и не го викна. Јас на протести отидов со благослов на неговото блажество, дедо Стефан, а тој таму дојде во патики и без мантија за да не го познаат. Не го носеше ни ранецот на рамо по кој го препознаваат луѓето. Зошто го смени ставот и критикува не ми е јасно, но не сакам да завлегувам во неговите мотиви – изјави за Либертас, владиката Агатангел.
Европскиот епископ Пимен во обид да ги смири демонстрантите во петокот на ФБ напиша:
„Вака ли го сведочиме мирот Христов верен народе? Рушиме општина во обид да спречиме “рушење” на црквата. Дајте да ги наполниме црквите наместо опшинските дворови. Само така се чува и брани црквата и верата мој верен народе! Бог од нас бара милост а не жртва! Сепак, фала Ти Господи за сè! “