„Цариградската патријаршија навикнала за издавање на томосот (указ со кој се потврдува автономниот статус на една црква) на православните цркви да добие паричен надоместок, како што со СПЦ се случило двапати. ЦПЦ не размислува за тоа, ниту, пак, својата автокефалност и слобода ќе ги купува со пари, а сигурен сум дека така размислува и МПЦ“, вели во интервју за Нова Македонија, г.г. Михаило.
На прашањето, дали МПЦ-ОА ја доживувате како жива црква, поглаварот на Црногорската православна црква со одговор:
– МПЦ-ОА е Божја и историска црква на македонскиот народ и држава. Под јурисдикција на Охридската архиепископија се наоѓала и Српската православна црква. Од јурисдикцијата на Охридската архиепископија, СПЦ излегла на неканонски и незаконски начин, за што постојат аргументи, кои ги сведочел Димитрије Хоматијан.
– МПЦ постојано води мисија за остварување на својата самостојност. Конечно во 1967 година е прогласена автокефалната МПЦ. Со тој историски чин се остварени вековните права на постоење и траење на македонскиот народ, црква и држава.
– Со таков величествен епилог, македонскиот народ се потврдил како државотворен и историски достоинствен народ, а Македонија како негова држава. Со тоа МПЦ ја докажала светоста на своето постоење и мисија. Конечно се одбиени и сите политички оспорувања на МПЦ од великодостојниците на СПЦ и великосрпската политика на Србија.
– Во време на големата агресија на СПЦ и на Србија кон МПЦ и македонската држава, претседателот на Македонија дал историски одговор дека на македонската држава никој не може да ѝ наметнува нова црква. Би сакале и црногорските државници да им упатат таков одговор на Српската црква и на официјална Србија. Уште еднаш потсетуваме дека СПЦ ниту дала, ниту, пак, има одговор зошто била под јурисдикција на Охридската архиепископија. Единствениот одговор е во анатемата на ОА, односно на нејзиниот архиепископ Димитрије Хоматин на Растко Немањиќ – свети Сава. вели г.г. Михаило.