Сакајќи да се изрази благодарност за Хрватска за помошта во евроинтеграциите и за добивањето на зелено светло за почетокот на преговарачкиот процес на земјава за членство во ЕУ, „Македонски пошти“ отпечатија марка за 9 мај – Денот на Европа и Денот на победата над фашизмот, но притоа е направен гаф во дизајнот.
На производот е ставена карта на актуелниот претседавач со ЕУ во некогашните граници на НДХ (Независна Држава Хрватска) со делови од БиХ, Србија и Црна Гора, наместо во актуелните. Веста ја презедоа и регионалните медиуми, а дел, особено во Србија, се запрашаа „гаф, скандал или провокација?“.
Промотивниот материјал е повлечен од интернет страницата на „Македонски пошти“. Директорот Ејуп Рустеми експресно свикал состанок на Управниот одбор кој е во тек и на кој се расправа чија е одговорноста за сторениот пропуст.