Во касарната „Страшо Пинџур” во Петровец беше одбележан Денот на најголемата борбена единица во Армијата – Првата пешадиска бригада.
„Во оваа најголема армиска единица рамо до рамо различни, а единствени Македонци, Албанци, Турци, Срби, Роми, Бошњаци, Власи ги покажувате својата стручност и своите највисоки способности и докажувате дека мултиетничноста е предност на нашата држава“, истакна министерката за одбрана Славјанка Петровска обраќајки им се на припадниците на бригадата.
Командантот на Командата за операции, бригаден генерал Бесник Емини во своето обраќање истакна дека од самиот почеток, развојот на бригадата ја одразува трансформацијата на нашата одбранбено-безбедносна заедница.
„Во континуитет работевме на подобрување на способностите и вештините на нашите состави од областа на операции и борбена готовност. Тој континуитет се должи на растот на процентот на издвоени финансиски средства кои се вложија за модернизација и опремување на Армијата согласно долгорочниот план за развој и модернизација. Како резултат на тој процес нашиот статус на подготвеност е значително зголемен и подобрен“, потенцира Емини и додава дека клучен приоритет мора да биде одржување на борбената готовност како дел од најголемиот сојуз во светот НАТО.
Командантот на бригадата, полковник Сашко Лафчиски посочи дека се исклучително и безрезервно посветени кон исполнување на зададените НАТО цели на способности.
На воената свеченост беше прогласена најдобрата единица од составот на бригадата, се доделија стимулативни мерки и награди и се изведе кратка културно-забавна точка. На крајот од свеченоста единиците од составот на бригадата изведоа свечено дефиле.
Првата пешадиска бригада го одбележува 2 април, како датум кога пред десет години оваа единица ги презема задачите и одговорностите на двете поранешни бригади, со што стана најголемата борбена единица со застапеност од повеќе армиски родови.
Северна Македонија минатата недела одбележа две години од членството на во НАТО. Оваа пролет на полигонот Криволак ќе се одржи најголемата вежба во земјава, вежбата „Свифт риспонс“ со над четири илјади учесници од осум НАТО земји – САД, Обединетото Кралство, Италија, Франција, Грција, Црна Гора, Албанија и нашата држава.