Велика Британија ја поддржува евроатлантската интеграција на Северна Македонија и се надева дека Европскиот совет на самитот во октомври на земјата ќе и даде датумот за почеток на преговорите за членство во ЕУ, вели британската амбасадорка во Скопје, Рејчел Галовеј во интервју за МИА.
-Ја поддржуваме евроатлантската интеграција на Северна Македонија и се надеваме дека датумот ќе се објави на октомврискиот Европски совет.Северна Македонија покажа лидерство и храброст во пристапот кон проблемот со името и постигна значаен напредок со бројни реформи. Општиот правец е позитивен, но за вистински промени треба време и постојани напори од сите учесници во општеството. Процесот на влегување во ЕУ треба да ги засили овие реформи, вели британската амбасадорка.
Галовеј во интервјуто говори и за значењето на владеењето на правото и потребите од реформи во правосудството и усвојувањето на нов закон за Јавно обвинителство од аспект на евроатлантските интеграции, за случајот „Рекет“, за позициите на Лондон кон Западниот Балкан и за статусот на македонските граѓани што живеат во Велика Британија по Брегзит.
-Политичките партии мора да го стават интересот на земјата пред сè. Реформите во обвинителството се дел од пошироките реформи поврзани со владеењето на правото коишто се приоритетни за ЕУ, за НАТО и за граѓаните на Северна Македонија. Ефективноста и интегритетот на целокупното правосудство е предуслов за национална стабилност и просперитет. Советот на ЕУ отсекогаш бил јасен дека треба да се утврди правна одговорност за сторените противзаконски дејства за кои јавноста дозна од прислушуваните разговори од 2015 година, вели Галовеј одговарајќи на прашањето што ако законот за ЈО не биде донесен.
По откривањето на случајот „Рекет“, Галовеј упати порака дека зацврстувањето на владеењето на правото е од витално значење за земјата и можност за независните институции да покажат посветеност на правдата за сите граѓани. На прашањето тоа значи дека случајот „Рекет“ станува, на некој начин, неформален услов за датум за преговори, британската амбасадорка вели дека „квалитетните законски рамки се важни, но владеењето на правото се заснова на нивната примена“.
-Случајот „Рекет“ е можност да се покаже делотворно, навремено и неселективно спроведување на законите. Најважно е граѓаните да видат дека владеењето на правото подеднакво важи за сите, вели таа.
За тоа како излегувањето на Обединетото Кралство од ЕУ ќе се одрази на односите на Велика Британија со земјите од Западен Балкан, особено со нашата земја, Галовеј вели дека Обединетото Кралство и по Брегзит ќе биде истата држава којашто беше досега: стабилна, отворена и праведна.
-Обединетото Кралство ќе остане поврзана со Северна Македонија и поширокиот балкански регион. Јасно е дека Западниот Балкан му е важен на Обединетото Кралство, како што покажавме со нашата четирикратно зголемена програмска поддршка, поброен кадар, како и со посетата на поранешната премиерка Тереза Меј во Скопје и посетата на министерот за надворешни работи Никола Димитров во Обединетото Кралство пред еден месец. Верувам дека нашите и онака цврсти билатерални односи ќе продолжат да се продлабочуваат и во иднина, вели Галовеј.
Конкретно за правата на македонските државјани што живеат во Обединетото Кралство, амбасадорката Галовеј вели дека „малку е веројатно дека статусот на македонските граѓани што живеат во Обединетото Кралство ќе се промени“.




