Советот на генијалци на министерот Тодоров доби зелено светло од Комисијата за заштита од дискриминација дознава НОВА од извори во комисијата. Седуммината членови кои заседаваа доцна попладне заклучиле дека нема дискриминаторски елементи во идејата на Тодоров , да формира совет од луѓе кои имаат коефициент на интелигенција над 140.
Иако одлуката сеуште не е официјализирана, дознаваме дека комисијата која прват се среќава со ваков случај, одлуката ја донела врз основа на странски искуства.
-Да, точно е дека дадовме зелено светло бидејќи странските искуства покажуваат дека министерот има право да бара специфичен облик на услуга, особено што не се работи за редовно вработување на лица, туку тоа е дополнителен ангажман изјави за НОВА Душко Миновски претседател на Комисијата.
Пет месеци откако беше објавен конкурсот во Министертвотоза здравство се јавиле 63 лица, од кои 20 се вратени на повторно интервју.
НОВА повеќе од две недели чека одговор на прашањата кои до кабинетот на министерот Тодоров беа пратени во електронска форма. Тодоров не одговори зошто цели пет месеци конкурсот што беше најавуван на големо тапка во место. Дали смета дека со овој потег ги ограничува сите оние кои сакаат да се пријават на конкурсот, се специјализирале од областа на јавното здравство, но не се обдарени со надпросечна интелегенција.
Професорката Мирјана Најчевска смета дека иако нема елементи за дисктриминација, идејата на Тодоров е обична глупост.
-Тоа не е дискриминација, но, со ова се покажува дека нестручноста станува вредносен елемент. На овој начин владата сака да покаже колку вложува во здравството, но со потполно неважни работи изјави за НОВА професорката Најчевска.
Таа потенцира дека некој може да има кофицинет на интелегенција 200, но тоа не значи дека може да биде советник од одредена област, која што не ја познава и за која не е стручен.
-Кандидатите од конкурсот може да бидат паметни, но да немаат познавања од областа која се бара од нив. Со овој чин само се замајува јавноста дека нешто навистина се прави вели Најчевска.
Тодоров во изминатиот период изјавуваше дека сака околу себе да има натпросечно интелигентни луѓе, кои би го советувале какви чекори да превземе, дека ќе го сослуша секое мислење, но одлуката на крајот ќе ја донесе самиот.
Без разлика дали ќе бидат редовно вработени или со договор на дело, овие луѓе сепак ќе бидат на товар на буџетот. Колку и да звучи забавно, додека Тодоров собира ум од генијалци кои немаат појма од реформите во здравството, цената ќе ја плаќа народот велат експертите.
Советот на Тодоров се отчекува да биде формиран по изборите, откога ќе го добие и официјално мислење на Антидискриминациската комисија.