Екс-премиерот Љубчо Георгиевски вели дека е невин и нема никаква врска со случајот „Поштенска Банка“, каде СЈО го сомнични дека заедно со екс-вицепремиерот Марјан Ѓорчев и тогашниот министер за финансии Никола Груевски за злоупотреба на службената положба. Тој пишува дека пред неполна година бил повикан во СЈО каде му била презентирана „бомба“ – телефонски разговор на Томе Главчев со висок функционер на власта. Од него тој барал одредени услуги и го спомнувал името на Никола Груевски во контекст на неговата банка, односно, дека Груевски во првата влада побарал од него да учествува во приватизацијата на Поштенска Банка.
„Кога бил викнат во СЈО ја сменил изјавата па рекол дека во Кабинетот на Георгиевски како Премиер бил повикан тој а Јас, Никола Груевски и Марјан Ѓорчев имаме побарано од него да учествува во приватизацијата“.
Откако енергично негирав дека немало таков разговор тој пак ја сменил изјавата и рекол дека само бил повикан од мене а таму имало неколку советници од владата. Јас понудив да му ги покажат сликите од советниците затоа што имав само девет, па би можел лесно да ги препознае. Сите други обвинети доблесно негирале дека никогаш со мене не воделе разговор за приватизацијата на Поштенска Банка“ напиша Георгиевски.
„И пред СЈО и сега пред јавноста недвосмислено изјавувам дека немам ништо со приватизацијата со Поштенска банка а уште помалку со второто дело за кое ги товарат. Се работи за јасни постапки на приватни бизнисмени каде што целиот интерес профит е за нивните фирми. Од сите обвинети личности во животот едно пиво се немам напиено. Жал ми е што и покрај тоа што во СЈО самите ми потврдија дека Томица Главчев три пати ја сменил изјавата повторно решиле да го извалкаат моето име“ напиша Георгиевски.
Во истрагата на СЈО, „Поштенска банка“ осомничени се девет лица, од кои тројца се веќе приведени пред судија на претходна постапка при Основниот суд Скопје 1.
Истрагата се води за делото: Перење пари и други приноси од казниво дело од чл.273 и се опфатени девет лица : Коле Смилевски, Томе Главчев, Ратко Димитровски, Викица Поповски, Гкеорги Каратолис, Кирил Јаневски, Зоранчо Митровски, Ристо Милев и Златко Ѓорчев. Од извршените кривични дела сторени во временскиот период од 2001 до 2010 година била прибавена имотна корист во износ од околу 5 милиони евра.
Според СЈО, во 2011 година Љубчо Георгиевски, како претседател на Владата на Република Македонија, Марјан Ѓорчев како вицепремиер и Никола Груевски како министер за финансии, со цел да го контролираат фактичкото функционирање на „Поштенска банка“, организирале во основањето на Банката, покрај „Македонска пошта“, која била во државна сопственост, да учествуваат и правните лица кои тие ги избрале – „Ноел Експорт импорт“ Гевгелија и печатница „Европа 92“ Кочани.
Согласно добиените насоки од наведените владини функционери, осомничените Томе Главчев, сопственик на „Ноел Експорт импорт“ Гевгелија и Ратко Димитровски, сопственик на „Европа 92“ Кочани, со кредити подигнати од три банки, ги уплатиле основачките влогови во „Поштенска банка“, по што осомничениот Коле Смилевски, како генерален директор на „Поштенска банка“ АД Скопје, овозоможил кредитирање на правните лица „Ноел Експорт импорт“ Гевгелија и „Европа 92“ Кочани и правни лица поврзани со нив. Сите средства добиени од кредити од „Поштенска банка“ се слеале на сметките на овие две правни лица и се искористени за враќање на првобитните кредити.
Станува збор за индиректно кредитирање на основачките влогови со средства од банката која се основа, што е спротивно на Законот за банки и преставува кривично дело – Злоупотреба на службената положба и овластување.
За лицата Љубчо Георгиевски, Марјан Ѓорчев, Никола Груевски, Томе Главчев и Ратко Димитровски, настапила застареност на кривичното гонење за кривичното дело Злоупотреба на службена положба и овластување.